WASAA WA HABARI LEO 25 MEI 2014

MH. PINDA AHUDHURIA IBADA YA KUMWEKA WAKFU ASKOFU WA MORAVIAN JIMBO LA RUKWA

*Ataka viongozi wa dini wasichoke kuombea amani ya Taifa 


 WAZIRI MKUU Mizengo Pinda amesema Serikali itaendelea kusimamia msimamo wake wa kutokuwa na dini wala nchi kutokuwa na dini lakini itaendelea kuruhusu watu wawe na dini zao. 


 Ametoa kauli hiyo jana mchana Jumapili, Mei 25 kwenye ibada ya kumuweka wakfu Askofu Mteule Conrad Nguvumali wa Kanisa la Moravian Tanzania Jimbo la Rukwa iliyofanyika kwenye Uwanja wa Nelson Mandela, mjini Sumbawanga. 

 Waziri Mkuu ambaye alikuwa mgeni rasmi kwa niaba ya Rais Jakaya Kikwete ambaye yuko nje ya nchi kikazi, alisema: 

“Leo tukiruhusu Serikali iwe na dini na tayari katika dini zote kuna makundi madogo madogo, je wale wa upande mwingine utawaacha wapi?”. 

 Pia alitumia fursa hiyo kuwaasa viongozi wa dini nao pia waangalie wasitumbikie kwenye mtego wa siasa na kuruhusu kanisa zima liwe la chama fulani kwani miongoni mwa waumini wao wapo pia wapenzi wa vyama vingine. 

 “Kama mtu binafsi, kiongozi wa dini anaweza kuwa mpenzi wa chama lakini kama Kanisa tusiruhu hali hiyo,” alionya.
Aliwaomba viongozi wa dini waendelee kuliombea Taifa na hasa waombee amani ya Taifa hili. 

“Ninawasishi viongozi wa dini msichoke kuombea amani ya Taifa hili kwani amani ikipotea kama nchi hatuna mahali pa kukimbilia.

MZINDAKAYA AGOMA KUMSAMEHE MBUNGE WA SUMBAWANGA MJINI...

Mbunge wa zamani wa jimbo la Kwela, Mzee Chrisant Mzindakaya (shoto) amekataa kumsamehe hadharani Mbunge wa sasa wa Sumbawanga Mjini, Bw. Aeshi Hilali (kulia) baada ya kupewa fursa ya kushikana mikono jukwaani na kusameheana.

Haya yametokea  leo mchana (Jumapili, Mei 25, 2014) kwenye ibada ya kumuweka wakfu Askofu Mteule Conrad Nguvumali wa Kanisa la Moravian Tanzania Jimbo la Rukwa iliyofanyika kwenye Uwanja wa Nelson Mandela, mjini Sumbawanga.

 Mzee Mzindakaya alikataa kufanya hivyo akisema yeye ni mkristu lakini hakuwa ameandaliwa kiroho kwa ajili ya tukio hilo. “Hapa ni shughuli ya kanisa na si mkutano wa Chama. Lazima niwe mkweli leo sijajiandaa kwa jambo hili… Mimi ni mtu mzima, nafsi ya msamaha inahitaji maandalizi, nahitaji maandalizi ya kiroho,” alisema.

Hata hivyo, alikiri kwamba amekubali msamaha alioombwa na Bw. Aeshi lakini hawezi kuutoa katika shughuli ya Kanisa. “Nilishamwambia Mwenyekiti wa CCM mkoa aitishe mkutano, wazee wa chama wawepo na sisi wawili tuwepo kwa sababu nimetukanwa sana kama vile sijaifanyia jambo lolote nchi hii,” alisisitiza.

 “Niliwaeleza pia waandae mikutano ya nje kule kwa wanachama ambako nilichafuliwa sana. Nikisema nimemsamehe hapa nitakuwa mnafiki,” aliongeza.

 Kwa upande wake, Bw. Aeshi ambaye alipewa nafasi ya kwanza kuomba msamaha, alisema anatambua kwamba bega haliwezi kukizidi kichwa na yeye kama mtoto anamuomba msamaha Mzee Mzindakaya kwa yaliyopita ili waweze kufanya kazi pamoja na kuleta maendeleo kwa wakazi wa jimbola Sumbawanga Mjini.

 “Natambua kuwa mimi ni mtoto na siku zote mdogo atabaki kuwa mdogo lakini naomba busara zake ili tushirikiane kuleta maendeleo ya mkoa wetu… yaliyopita si ndwele tugange yajayo. Nimetamka maneno haya mbele ya viongozi wa dini na mbele ya Mungu kwa kuwa najua yuko hapa,” alisema.

 Mkuu wa Mkoa wa Rukwa, Mhandisi Stella Manyanya ndiye aliwaomba Mzee Mzindakaya na Bw. Aeshi wapande jukwaani na kupeana mikono na kisha akawapa kila mtu fursa ya kutoa neno.

 Mhandisi Manyanya alisema siku ya leo ni ya kipekee na akaona asipoteze fursa hiyo bali aitumie kuwaomba viongozi hao ambao wamekuwa na uhasama wa muda mrefu wayamalize kwa kupeana mikono hadharani.

POLISI WAUNGANISHA NGUVU KUKABILIANA NA UHALIFU MTANDAO

Polisi wa visiwa vya kifalme vya Solomon vilivyopo pasifiki ya kusini wameunganisha nguvu katika mapambano dhidi ya uhalifu mtandao na kuelezwa ya kwamba nguvu kubwa itasogezwa mashuleni ili kukuza uelewa wa maswala ya uhalifu mtandao (Awareness) na kusisitizwa hiyo ndio itakua shabaha yao ya awali.

Hayo yamebainishwa na Bradford Theonomi Kupitia program ya mpango uliopewa jina la “Cyber safety pasifika” uliopangwa kuwasaidia watoto, vijana na wakubwa kutumia teknolojia katika hali ya usalama iliyojiri kuanzia mnamo tarehe 19 -25 May mwaka huu (2014) ulilenga kuhakiki matumizi salama ya mitandao visiwani humo unapewa kipaumbele na ukanda mzima wa pasifiki ya kusini kwa ujumla wake.

Makubaliano hayo yalifikiwa wakati wa mkutano ulio fanyika na kuwahusisha wakuu wa polisi wa visiwa hivyo. Kauli mbiu iliyo someka kama “ Historia yetu, Utamaduni wetu na mitandao yetu” Ilidahmiriwa kuhamasisha matumizi salama ya mitandao na simu katika ukanda huo wa pasifiki ya kusini.

Bi. Juanita Matanga, Mkuu wa polisi wa visiwa hivyo aliainisha utayari wa kujipanga kukabiliana na uhalifu mtandao huku akitolea maelezo ukuaji wa kasi wa matumizi ya mitandao na simu katika visiwa hivyo na duniani kwa ujumla.
Aidha Alieleza ukuwaji wa matumizi ya mitandao bahati mbaya wengi hawajui athari zake. Hilo ndilo lililo wasukuma kuanzisha kampeni hiyo ya kukuza uelewa wa maswala ya uhalifu mtandao (Cybercrime Awareness Campaign) visiwani humo.

Matanga alisisitiza kampeni hiyo itakua endelevu na pia kutakua na kupitia sharia zilizopo ili kuweza kuziboresha kuhimili makosa ya uhalifu mtandao.
 Alianisha pia katika visiwa hivyo bado ukuaji wa kasi wa makosa ya kimtandao haujaanza kuonekana na polisi visiwani humo wako katika kuhakiki wanakuza uelewa kwa raia wake ili kuweza kukabiliana na hali hiyo – Kuzuia tatizo ni bora zaidi kuliko kusubiri tatizo litokee ili kuanza kukabiliana nalo.

Mkuu huyo wa polisi alianisha pia yakua nchi nyingine za ukanda huo wa pasifiki  tayari wamesha kua na taratibu wa kuhamasisha matumizi bora ya mitandao kukabiliana na uhalifu mtandao (Cybercrime awareness programs)  na umefika wakati visiwa hivyo navyo kuingiza taratibu hiyo katika vitendo na kusisitiza tena kua swala hilo litakua  endelevu.

MELI ZA JESHI LA UTURUKI NCHINI KUTIA NANGA DAR ES SALAAM


 Ziara ya Meli za Jeshi la Uturuki Nchini Tanzania.
Meli Nne za Kijeshi za Uturuki kwa jina la Barbaros Turkish Maritime Task Group (TMTG) zinatarajiwa kutia nanga kwa wakati mmoja katika Bandari ya Dar es Salaam kwa ziara ya kijeshi ya siku 4 ambao itahusisha maonyesho ya zana za kijeshi, mazoezi ya pamoja na jeshi la wanamaji la Tanzania, huduma za kijamii na ushirikiani wa kijeshi baina ya Uturuki na Tanzania. 

Hayo yamebainishwa jiji Dar es Salaam na Balozi wa Uturuki nchini, Ali Dovitoglu katika mkutano na waandishi wa habari, uliofanyika Ubalozi wa Uturuki, jijini Dar es Salaam. 

Balozi Dovitoglu amesema lengo kuu la ziara hiyo ni kukuza ushirikiano wa kijeshe baina ya jeshi la Uturuki na majeshi ya nchi 27 za pwani barani Afrika sio tuu kuonyesha uwepo na uwezo wa kijeshi wa Jeshi la Wanamaji la Uturuki, bali pia kusaidia katika operetions mbalimbali za kijeshi barani Afrika ukiwemo vita dhidi ya uharamia kwa Pwani ya Bahari ya Hindi. 

Balozi Dovitoglu amesema meli hizo zitawasili siku ya Jumanne tarehe 27/05/2014, Siku ya Jumatano, tarehe 28/05 2014 waandishi wa habari watakaribishwa kufanya ziara katika meli hizo, baadaye wanamaji hao, watatembelea shule na kituo cha watoto yatima kugawa misaada ya kibinaadamu. 

Siku ya Alhamisi na Ijumaa, wananchi wa jiji la Dar es Salaam na vitongoji vyake, wataruhusiwa kutembelea meli hizo kwa muda wa siku 2 kuanzia saa 3 asubuhi mpaka saa 6 mchana kujionea maonyesho ya zana za kijeshi ya Uturuki ambapo makampuni manane ya vifaa vya kijeshi ya Uturuki wataonyesha vifaa vyao. 

Makampuni hayo ni Meteksan, Otokar, TAI, Dearsan, Havelsan, Roketsan, Aselsan na STM

Meli hizo nne ni F-495 TCG kwa jina la Gediz, F-245 TCG, Oruçreis, F-511 TCG Heybeliada meli ya usindikizaji ya A-595 TCG Yarbay Kudret Güngör, zitasafiri kwa jumla ya safari ya urefu wa kilometa 30,000 katika ziara itakayochukua siku zaidi ya 100 ambapo itatembelea nchi 28 barani Afrika na kutia nanga katika bandari 40. 

 Msafara wa meli hizo, unaingia Tanzania ukitokea nchini Afrika ya Kusini, ambapo hii ni mara ya kwanza ndani ya kipindi cha miaka 148 iliyopita ndipo meli ya mwisho ya Uturuki ilitia nanga kwa mara ya mwisha katika Rasi ya Tumaini Jema (Cape of Good Hope) mwaka 1866. 

 Uturuki ni moja ya mataifa makubwa yenye nguvu kubwa za kijeshi la la majini, tangu enzi za utawala wa kale wa dola la Ottoman ambapo walitawala bandari nyingi barani Afrika ikiwemo miji ya Kilwa, Sofala, na Lamu kwatika Pwani ya Bahari ya Hindi.

 

 

KURA KUHESABIWA UPYA LEO NCHINI MALAWI.

Nchini Malawi kura za uchaguzi mkuu zinatarajwa kuhesabiwa upya hii leo katika maeneo ambapo imedhihirika kuwa idadi ya wapiga kura haiwiani na idadi ya wale waliojiandikisha kupiga kura.

Uchaguzi mkuu wa Malawi umezidi kuchukua sura mpya baada ya wanasiasa na wanasheria nchini humo kupeleka malalamiko yao mahakamani, na kuzidi kuchelewesha matokeo ya uchaguzi huo uliofanyika jumanne iliyopita.
Kulingana na mwandishi wa idhaa ya Kiswahili ya BBC aliye mjini Lilongwe, Baruan Muhuza, hali nchini humo imekuwa ya sintofahamu ambapo hakuna ye yote anayejua uchaguzi utaishia wapi.
Anasema kuwa tume ya uchaguzi imekiri kuwa kuna maeneo kadhaa ambayo kuhesabu kwa kura kutarudiwa kwa sababu kura zilizopigwa zinazidi waliojisajili.
" Tume ya uchaguzi inasema kuwa kuna maeneo mengine ambako watu wamepiga kura mara tatu au mara nne kama vile mji wa Mangochi waliosajiliwa ni watu 39,000 pekee lakini kura zilizopatikana hapo ni 180,000," Baruan alisema.

AU: KUTEKWA NYARA WANAFUNZI KUNAKINZANA NA UISLAMU

Rais Muhammad Ould Abdulaziz wa Mauritania ambaye pia ni Mwenyekiti wa mzunguko wa Umoja wa Afrika, amesema kuwa kitendo cha kutekwa nyara zaidi ya wanafunzi wa kike 200 na kundi la Boko Haram nchini Nigeria, kunakinzana na mafundisho ya dini tukufu ya Kiislamu.

 Rais Muhammad Ould Abdulaziz ameyasema hayo katika ujumbe alioutoa kwa watu wa bara la Afrika katika sherehe za kuadhimishwa miaka 51 ya kuasisiwa Muungano wa Nchi Huru za Afrika OAU.

 kabla ya kubadilishwa na kuitwa Umoja wa Afrika AU, ambapo pamoja na mambo mengine amelaani vikali kitendo hicho na kutaka wanafunzi hao waachiliwe huru mara moja na bila ya masharti yoyote.

 Mwenyekiti huyo wa mzunguko wa Umoja wa Afrika ameongeza kuwa, hali ya mambo nchini Mali, Nigeria, Jamhuri ya Afrika ya Kati, Somalia, Sudan Kusini na Libya, ni changamoto kubwa kwa umoja huo na hivyo amezitaka pande hasimu katika nchi hizo kumaliza tofauti zao ili kudhamini usalama na maendeleo kwa wananchi wao.

 Kwa upande mwingine Rais Muhammad Ould Abdulaziz amekutaja kujitosheleza katika chakula, kustawisha biashara ya bidhaa za kilimo, kupambana na umasikini na lishe duni kuwa mambo yanayopewa kipaumbele na Umoja wa Afrika.

MAGAIDI WA KIKRISTO WAUA VIJANA WAISLAMU CAR

Msemaji wa Jumuiya ya Waislamu katika Jamhuri ya Afrika ya Kati amesema, wanamgambo wa Kikristo nchini humo wamewaua vijana watatu Waislamu na kukatakata viungo vyao vya mwili.
 Othman Abakar, msemaji wa Jumuiya ya Waislamu wa Jamhuri ya Afrika ya Kati ameongeza kuwa, vijana hao Waislamu wameuawa mjini Bangui wakati walipokuwa wakijitayarisha kuenda kutazama mechi ya mpira.
 Imearifiwa kuwa mechi hiyo ilikuwa baina ya vijana Waislamu na Wakristo kwa lengo la kuleta amani na maelewano baina ya Waislamu wa kundi la Seleka na wanagamabo wa Kikrsito wa kundi la Anti Balaka.
Msemaji huyo wa Waislamu ameongeza kuwa miili ya vijana hao waliokuwa wakaazi wa mtaa wa PK5 katika mji mkuu Bangui imezikwa katika msikiti mmoja mjini humo.
 Hayo yanajiri katika hali ambayo msemaji wa kundi la Kikristo la Anti-Balaka Sebastien Wenezoui amedai kulaani mauaji hayo na kuongeza kuwa vijana wengine 10 Waislamu wametekwa nyara katika tukio hilo.
 Amesema ukatili huo umetekelezwa na vijana wa Kikristo kutoka mtaa wa Boy-Rabe mjini Bangui.
 Hayo yanajiri katika hali ambayo siku ya Jumamosi kuliripotiwa mapigano makali baina ya wanajeshi wa Ufaransa na Waislamu watiifu kwa kundi la Seleka katika mji wa Bambari.
 Wanajeshi wa Ufaransa wajulikanao kama Sangaris wamekuwa wakiwashambulia Waislamu na kupuuza ugaidi unaofanywa na wanamgambo wa Kikristo.

KARZAI AKATAA KUKUTANA NA OBAMA MJINI BAGRAM

Rais Hamid Karzai wa Afghanistan amekataa ombi la Rais Barack Obama wa Marekani la kukutana naye katika uwanja wa Jeshi la Anga la Marekani mjini Bagram nje kidogo ya Kabul, mji mkuu wa Afghanistan.
Siku ya Jumapili rais wa Marekani aliwasili Afghanistan katika safari ya kushtukiza na kukataa kuenda Kabul kukutana na wakuu wa serikali ya Afghanistan.
 Afisa wa Marekani ambaye hakutaka jina lake litajwe amesema ni kweli Karzai alialikwa kukutana na Obama lakini aliktaa. Imearifiwa kuwa Karzai alisema yuko tayari kukutana na rais wa Marekani katika Ikulu ya Rais mjini Kabul na si katika uwanja wa ndege za kijeshi wa Bagram. Uhusiano wa Kabul na Washington umevurugika kufuatia hatua ya Rais Karzai kukataa kutia saini mkataba wa usalama na Marekani. Mkataba huo ungeiruhusu Marekani kuendelea kubakisha vikosi vyake Afghanistan hata baada ya kumalizika muhula wa mwaka huu wa 2014 ambapo Marekani inatakiwa kuwa imeviondoa vikosi vyake vyote Afghanistan. Akiwa katika safari yake hiyo ya kushtukiza nchini Afghanistan, Obama amesema Marekani itamaliza oparesheni zake Afghanistan mwaka huu lakini akaongeza kuwa Washington itabakisha vikosi vyake nchini humo.