WASAA WA HABARI LEO JUMANNE 2 JULAI 2014.

WAZIRI MKUU: OMBEENI TAIFA NA UCHAGUZI MKUU UJAO - ASKOFU NIWEMUGIZI ATAKA UKAWA WARUDI BUNGENI MWEZI UJAO, ASEMA SIYO OMBI.

WAZIRI MKUU Mizengo Pinda amewaomba viongozi wa dini kote nchini na wananchi waungane pamoja ili kuombea uchaguzi mkuu wa viongozi wakuu wa Rais, wabunge na madiwani unaotarajiwa kufanyika mwakani.

Ametoa wito huo leo mchana (Jumanne, Julai mosi, 2014) wakati akizungumza na maelfu ya waumini na viongozi mbalimbali waliohudhuria ibada ya Jubilei ya miaka 25 ya Askofu Mkuu wa Jimbo Katoliki la Iringa, Mhashamu Tarsicius Ngalalekumtwa katika uwanja wa Kichangani wa Kanisa Kuu la Kihesa.

"Maaskofu wote mliopo hapa, najua mnavyoipenda Tanzania... kila kanisa lina sala maalum ya kuliombea Taifa na viongozi wake, ninawaomba viongozi wetu mliombee Taifa letu ili mambo yaende salama na hasa uchaguzi wa mwakani," alisema.

Akirejea mahubiri yaliyotolewa kwenye ibada hiyo na Mhashamu Askofu Mkuu Paulo Ruzoka wa Jimbo Katoliki la Tabora ambaye alitoa mfano wa Daudi na Goliathi, Waziri Mkuu alimfananisha Goliathi na masuala ya rushwa, ubinafsi na tabia ya viongozi kutojali wananchi wa hali ya chini.

"Viongozi tusipokuwa waadilifu, tukawa wala rushwa na hatujali wananchi wa hali ya chini tutakuwa sawa na Goliathi. Nawasihi sana ombeeni Taifa hili na uchaguzi mkuu ujao ili Mungu atupe Daudi atakayeweza kuliongoza Taifa hili na kulipeleka kunakostahili," alisema huku akishangiliwa.

Waziri Mkuu ambaye alihudhuria sherehe hizo kwa niaba ya Rais Jakaya Kikwete, ametumia fursa hiyo pia kuwaomba wote kwa pamoja waendelee kuliombea Taifa katika kipindi hiki cha mchakato wa kuandaa Katiba Mpya. "Watanzania wote tuwe na moyo wa kuvumiliana na kupendana. Tumuombe Mungu atuwezeshe kupata Katiba mpya katika hali ya maelewano na amani. Tuombee Taifa na tuombee Watanzania ili tusije tukatoka katika mstari."

Alisema ushauri uliotolewa na Makamu wa Rais wa TEC, Askofu Severini Niwemugizi wa kuwataaka wajumbe wa Bunge Maalum la Katiba warejee mara moja ni wa muhimu. "Ushauri wa Baba Askofu ni wa makini, turudi tukabishane pale ndani, lakini pamoja na yote sheria inasema mwamuzi wa mwisho ni Watanzania kupitia kura ya maoni. Wale tuliopewa dhamana ya kupitia rasimu turudi pale tuikamilishe ili Watanzania waweze kupata fursa ya kupiga kura ya maoni," alisema.

Mapema, akiwasilisha salamu kutoka Baraza la Maaskofu Katoliki Tanzania (TEC), Askofu Severini Niwemugizi wa Jimbo la Ngara aliwataka wajumbe wa Bunge maalum la Katiba kurejea kwenye mkutano wake uliopangwa kuanza Agosti 5, mwaka huu.



"Ninatumia neno kuwataka na siyo kuwaomba warejee bungeni mwezi ujao. Wasipofanya hivyo au kufanya mizengwe mingine na kutupatia Katiba isiyotufaa, nitawaomba Watanzania wote tuweke uzalendo mbele na kuikataa rasimu ya Katiba itakayoletwa na pia tuwanyime uongozi katika uchaguzi mkuu ujao," alisema.

Aliwataka Watanzania wajitokeze kwa wingi wakati wa kujiandikisha kwenye daftari la wapiga kura. "Watanzania tuna tabia ya kudharau siasa. Tusidharau masuala ya siasa kwa sababu ni muhimu na yanagusa maisha yako na yangu, yanagusa maisha ya watoto wako," alisema.

Sherehe hizo za jubilei ya miaka 25, zilihudhuriwa na maaskofu 19 kutoka majimbo mbalimbali ya kanisa katoliki hapa nchini, wawakilishi wa maaskofu watatu na abate mmoja. Viongozi wa kitaifa waliohudhuria ni Spika wa Bunge, Mama Anne Makinda; Rais Mstaafu wa awamu ya tatu, Mhe. Benjamin Mkapa; Waziri Mkuu mstaafu, Edward Lowassa na baadhi ya wabunge wa mkoa wa Iringa.

FILIKUNJOMBE AWAHAKIKISHIA UMEME WANANCHI WA LIPINGU KABLA YA KRISMASS.
 MBUGE  wa  jimbo la Ludewa Deo Filikunjombe ageuka mbogo kwa wale  wenye nia ya kukwamisha maendeleo  jimboni awahakikishia   wananchi wa  kata ya Lupingu  kupata  umeme  kabla ya Krismass na  kuwa  zoezi la  kuanza kuchimba mashimo ya  kuweka nguzo  za umeme  litaanza  jumatatu likiongozwa nay eye  mwenyewe .

Huku akiwataka  wananchi  wa kata ya  Lupingu  kutomchagua  diwani  wao katika uchaguzi mkuu  wa mwaka 2015  iwapo atashindwa  kushiriki  kikamilifu katika usimamizi na ushiriki wa  maendeleo katika mradi  huo.

 

Mbunge Filikunjombe  alitoa ahadi  hiyo iliyopokelewa kwa  shangwe  kubwa na wananchi wa  vijiji  vitatu  vya kata ya Lupingu  leo  wakati alipoongozana na wataalam wa shirika la ugavi wa umeme nchini (TANESCO) katika vikao vya pamoja na viongozi wa  serikali  za mitaa na uongozi wa  wilaya na ule  wa Tanesco mkoa  na  wilaya ya  Ludewa .

 

Alisema  kuwa amelazimika  kupigania umeme  katika vijiji  mbali mbali vya  jimbo la Ludewa kama  sehemu ya kuwakumbuka wananchi  wake na  kuongeza idadi ya  vijiji vya  jimbo hilo la Ludewa kuwa na umeme  kutoka  kijiji kimoja alichokikuta wakati akiingia madarakani hadi  vijijini zaidi ya 10 sasa ambavyo   vina uhakika  wa kupata  umeme na baadhi tayari  vimepata  umeme  tayari .

 

Hivyo alisema  itapendeza  kuona wananchi na vijiji  vyote  vya kata ya Lupingu ambavyo ni pamoja na Nindi ,Ntumbati na Lupingu kupata  umemne kabla ya sikukuu ya krismasi na kuwa akiwa kama mbunge hatapenda kuona mtu ama kiongozi  yeyeyo anakwamisha mradi  huo kwa  wananchi .

 

“Napenda  kuwa mkweli katika  hili lengo la serikali ya  chama cha mapinduzi  ni kuona  wananchi  wake  wanaendelea  kupata maisha  bora  na  si kwa  wana CCM pekee ni  wote hata  wapinzani kwani maendeleo ya umeme na mengine  hayajawalenga  wana CCM ni wote  …..sasa  kama  hivyo  ndivyo ni lazima  wananchi  wote  kushiriki maendeleo  yetu na Yule atakayekwamisha  tutashughulika nae na katika  hili nitakuwa mkali  zaidi” alisema mbunge  Filikunjombe 

 

Kuwa iwapo  mtendaji wa  serikali ya kijiji  mwenyekiti au  diwani watabainika  kuwa  ni kikwazo katika uendelezaji wa maradi  huo basi  ni wazi watawajibishwa  wao kwanza ili  kuonyesha mfano wa  wananchi  kushiriki kupokea miradi.

 

Mbunge  huyo alisema kuwa kama mbunge atakuwa msitali wa mbele  kuunga mkono maendeleo  hayo na katika  kuwaonyesha mfano  wananchi hao kuwa  hawakukosea katika kuchagua  siku ya jumatatu atafika  eneo la mradi  mapema asubuhi akiwa na vitendea kazi kwa ajili ya kuungana na  wananchi wa kata ya Lupingu katika uchimbaji wa mashimo ya nguzo za umeme  .

Katika hatua  nyingine  mbunge  Filikunjombe aliipongeza  wizara ya ujenzi kwa  kuwaondolea kero ya  miundo mbinu wakazi wa kata hiyo ya Lupingu ambao siku  zote  walikuwa  wakitembea  zaidi ya kilometa  zaidi ya 30 kwa miguu  kuelekea  mjini Ludewa kupata huduma mbali mbali kutokana na ubovu wa barabara ila kwa sasa wananchi hao  wamepatiwa barabara ya uhakika na tayari kuna usafiri wa daladala unaotoa huduma maeneo hayo kila  siku.

MAGUFULI AVUNA WANACHAMA WAPYA 376 KATIKA VIJIJI VITATU

Mbunge wa Jimbo la Chato ambaye pia ni Waziri wa Ujenzi Dkt. John Pombe Magufuli akipeana mikono na Wanachama wapya wa Chama cha Mapinduzi (CCM) walioamua kujiunga na chama hicho mara baada ya Mbunge huyo kufanya Mkutano mkubwa wa hadhara katika kijiji cha Nyabugela, kata ya Mganza katika Wilaya ya Chato leo.

Mbunge wa Jimbo la Chato ambaye pia ni Waziri wa Ujenzi Dkt. John Pombe Magufuli kihutubia mamia ya wakazi wa kata ya Mganza katika Wilaya ya Chato leo.

Wananchi wa Kata ya Mganza wakimfurahia Mbunge wa Jimbo lao la Chato Mheshimiwa Dkt. John Magufuli wakati akiwahutubia na kuwasisitiza wafanye kazi kwa bidii ili waweze kujiletea Maendeleo.

Mbunge wa Jimbo la Chato ambaye pia ni Waziri wa Ujenzi Dkt. John Pombe Magufuli akiwapokea wanachama wapya zaidi ya 100 walioamua kujiunga na Chama cha Mapinduzi CCM mara baada ya mbunge huyo kumaliza hotuba yake.

Wanachama wapya wa Chama cha Mapinduzi kata ya Mganza wakila kiapo mbele ya Mbunge wao Mheshimiwa Dkt.John Magufuli ambaye pia ni Waziri wa Ujenzi baada ya kukabidhiwa kadi za uanachama hivi leo.

Waziri wa Ujenzi ambaye pia ni mbunge wa Chato Mheshimiwa Dkt John Pombe Magufuli amezidi kuongeza idadi ya wanachama wapya katika Chama cha Mapinduzi (CCM) baada ya mkutano wake wa siku moja kuzoa wanachama wapya 376.

Hali hiyo imekua pigo kubwa kwa vyama vingine vya siasa kwasababu katika muda mfupi wa mikutano ya Mbunge huyo idadi ya wanachama waliotoka katika vyama vya upinzani imezidi kuongezeka.

Katika mikutano hiyo iliyofanyika katika vijiji vya Nyisanzi, Kasenda na Muganza. Dkt. Magufuli alieleza jinsi alivyotekeleza ahadi mbalimbali zilizomo kwenye za Ilani ya Uchaguzi ya CCM katika kutatua kero mbalimbali za wanachi.

“Mlinichagua kwa kura nyingi sana hapa na mimi lazima nionyeshe mfano katika kuwatumikia na naahidi vitu vyote nilivyoahidi nimetekeleza kwa sehemu kubwa kuanzia kwenye shule, huduma za afya, barabara, maji na umeme” alisema Dkt. Magufuli

Katika hatua nyingine Dkt. Magufuli aliwaasa vijana kufanya kazi kwa bidii na kuacha kudanganywa na wanasiasa uchwara.

“Nawaambia hakuna kitu cha bure, wala hakuna mtu atakayewaletea kitu chochote kama hamtajishughulisha, mfanye kazi muache maneno ya kukaa vijiweni” alisema Dkt Magufuli 

Akizungumza huku akishangiliwa na umati wa watu, Dkt. Magufuli aliwataka wakazi wa Muganza kufanya kazi kwa bidii na kutumia fursa za kiuchumi zinazoanza kufunguka katika kata hiyo.

“Hapa Muganza ndipo linajengwa lango kuu la watalii kuelekea hifadhi ya Taifa ya Rubondo, hivyo ni bora mkajianda mapema na fursa hii, mkikaa bila kufanya kazi fursa hizi zitawapita tu” alisema Dk. Magufuli

Aidha, Mbunge huyo wa Chato pia alisema watanzania wanatakiwa kudumisha Amani iliyopo isije kupotea kwani gharama yake ni kubwa.

Waziri Magufuli alitolea mfano wa nchi za Misri, Libya na Iraq jinsi zilivyokuwa na Amani hapo zamani lakini sasa hivi hali yake ni mbaya watu wanauana kila muda.

“Wakataeni wanasiasa wanaohubiri siasa chafu za kuvuruga Amani, na eti kudai hadi kieleweke vinginevyo damu itamwagika, akija mtu kama huyo mwambieni amwage damu yake kwanza, msimkubali kwani atawapoteza” alisisitiza Dkt. Magufuli.

Katika hatua nyingine Waziri Magufuli amewaahidi wakazi wa Muganza kuwa Serikali itamalizia kipande cha barabara kisichozidi kilomita tatu katika kata hiyo, kwani ni ahadi ya Mhe. Rais na tayari Wizara ya Ujenzi kwenye bajeti yake ya mwaka huu wa fedha 2014/15 imetenga kiasi cha sh. 50.mil kwa ajili ya kuanza maandalizi ya mwanzo ya ujenzi wa barabara hiyo.

“Serikali ya CCM imeahidi na itatekeleza ahadi yake, tumejenga barabara kila kona ya nchi hatuwezi kushindwa kumalizia kipande hichi kidogo, alisema Dkt. Magufuli .

Pia katika mikutano hiyo waziri Magufuli alitoa michango mbalimbali katika shule na vituo vya afya.

 

JESHI LA POLISI IRINGA WALAKAMATA WATUHUMIWA WA MWANAFUNZI ALIYECHOMWA MOTO, MWILI WAKE WAAGWA LEO

Jeshi  la Polisi mkoani iringa   linawashikilia watu wanne ambao ni walinzi wa waliokuwa wakilinda nyumba moja ya kulala wageni iliyopo kihesa katika manispaa ya iringa kwa madai ya kumchoma moto mwanafunzi.

 

Akithibitisha kutokea kwa tukio hilo Kamanda wa Polisi Mkoani Iringa Ramadhani Mungi alisema tukio hilo lilitokea Juni 24 majira ya saa tisa usiku baada ya wasamaria wema kutoa taarifa polisi kuwa kuna mtu anatembea akiwa anawaka moto.

 

Mungi alisema mara baada ya kupata taarifa hiyo   Jeshi la Polisi lilifika katika  eneo hilo  na kumkuta Daniel  Lema (25)  akiwa ameanguka chini huku akiwa amefungwa mikono nyuma.

 

Kamanda huyo aliwataja  watuhumiwa hao waliomchoma moto kuwa ni  Mussa Nganga (28), Costa Mgayuka (38), Steven Kalole (24) na Samson Peter (24) wote wakazi wa Kihesa waliokamatwa kabla ya kutoweka mjini iringa.

 

  “Tulipopata taarifa tulifika eneo hilo kwa haraka na tukamkuta ameanguka chini tulimfungua ile mikono na kumchukuza vizuri tulimkuta akipumua kwa shida ndipo tukamkimbiza hospitali ya rufaa ya mkoa wa Iringa kwa ajili ya kupata matibabu.”alisema Kamanda Mungi

 

Alisema kuwa  mwanafunzi huyo alikuwa baa moja inayoitwa In box bar inayomilikiwa na Katibu Mkuu wa zamani wa TFF, Frederick Mwakalebela akipata kinywaji huku akiangalia michuano ya mpira wa miguu (kombe la dunia) ambayo inaendelea nchini brazili.

 

“Mwanafunzi alikuwa anaangalia michuano hiyo ya mpira wa miguu kwenye baa hiyo na baada ya mpira huo kuisha aliondoka na kuelekea nyumbani kwake Kihesa kabla ya kufika nyumbani eneo hilo kuna nyumba ya kulala wageni iitwayo Glory lodge ambapo pembeni yake kuna grocery moja iitwayo Glory grocery  akaingia hapo akifikiri ipo wazi ili aendeleze kinywaji,” alisema.

 

Alisema wakati akigonga mlinzi wa nyumba ya kulala wageni Glory lodge  ambae ni mmasai aitwaye Mussa Nganga alimuona na kumuita ndipo kijana akakimbia na baada ya kukimbia alimfukuza na kuwaita wenzake watatu na kumfanyia kitendo kama hicho.”alisema Mungi .

 

Baada ya kufikishwa Hospitali ya Rufaa ya Iringa, Lema aliendelea na matibabu yake mpaka alipokutwa na mauti jumatatu majira ya saa nane mchana. 

Mwili wa Daniel Anael Lema, aliyekuwa mwanafunzi wa mwaka wa nne wa shahada ya sheria katika Chuo Kikuu Kishiriki cha Mt. Augustino, Tawi la Iringa (Ruaha University College - RUCO) umeagwa jana na kusafirishwa kuelekea mkoani kwao kilimanjaro kwa mazishi.

Wanafunzi kadhaa wa chuo hicho na baadhi ya wananchi wa manispaa ya Iringa walioguswa na tukio hilo walijitokeza katika hospitali ya mkoa wa Iringa ambako shughuli ya kuuga mwili huo ilifanyika.

 

WANNE WAFARIKI DUNIA KATIKA AJALI YA NDEGE NAIROBI

Watu wanne wamefariki dunia asubuhi ya leo na wengine kadhaa kujeruhiwa baada ya ndege ya mizigo iliyokuwa ikielekea mji mkuu wa Somalia, Mogadishu kugonga jengo la kibishara katika eneo la Embakasi, baada ya kupaa kutoka Uwanja wa Ndege wa Kimataifa wa Jomo Kenyatta jijini Nairobi.

 Joseph Ngisa Mkuu wa Upelelezi katika Uwanja wa Kimataifa wa ndege wa Jomo Kenyatta (JKIA) amesema kuwa, uchunguzi wa mwanzo umeonesha kuwa ndege hiyo ilikuwa inapaa katika masafa ya chini baada ya kutoka uwanjani na kwamba iligonga mlingoti wa umeme kabla ya kuanguka. 

 Waliofariki dunia kwenye ajali hiyo ni watumishi wanne waliokuwa ndani ya ndege hiyo ya mizigo aina ya Fokker 50.

Maafisa wa Kenya wamesema kuwa, uchunguzi bado unaendelea ili kubaini chanzo kikuu cha ajali hiyo.

ISRAEL YASAIDIA NIGERIA KUWATAFUTA WASICHANA

Kikosi cha Israel cha kukabiliana na ugaidi kinatarajiwa kujiunga na juhudi za kuwatafuta zaidi ya wasichana 200 waliotekwa nyara nchini Nigeria na wanamgambo wa kundi la Boko Haram.

Kundi hilo litajiunga na wataalamu wa Marekani,Uingereza na ufaransa ambao tayari wako nchini Nigeria.

Rais Goodluck Jonathan amesema kuwa kujiunga kwa Israel katika operesheni hiyo ni wazi kwamba dunia nzima inaunga mkono usakaji wa wasichana hao.

Mwandishi wa BBC nchini Nigeria amesema kuwa uwepo wa wataalam wa Israel katika oparesheni hiyo huenda kukazua hisia za kisiasa nchini Nigeria ambapo wasiwasi kati ya wakristo wanaoshi kusini mwa taifa hilo na waislamu wanaoishi kazkazini huzua ghasia.

Awali Gavana wa jimbo la Borno Kaskazini Mashariki mwa taifa hilo, eneo ambalo wasichana hao walitekwanyara alisema kuwa ana habari kuhusu kule walipo wasichana hao.

NICOLAS SARKOZY AFANYIWA UCHUNGUZI

Rais wa zamani wa Ufaransa , Nicolas Sarkozy, amefikishwa mahakamani mjini Paris, kwa tuhuma za kutumia nafasi yake vibaya miongoni mwa tuhuma nyenginezo kuhusiana na makosa makubwa ya uchaguzi.

Sarkozy anajipata tena matatani tangu kupoteza kinga ya kushtakiwa mda mfupi baada ya kupoteza kiti cha urais kwa muhula wa pili , kilichonyakuliwa na rais wa sasa Francois Hollande hapo 2012.

Sarkozy anakana kuwa alipata ufadhili kinyume cha sheria katika uchaguzi huo.

Awali alihojiwa kutokana na tuhuma za kufanya ushawishi kuhusu kesi inayochunguzwa kupata ufadhili wa fedha za kampeni kinyume cha sheria , ikiwemo kupokea fedha kutoka kiongozi wa zamani marehemu Muamar Ghadafi.

Mwanasheria wa Bwana Sarkozy, alihojiwa Jumatatu kuhusu tuhuma za kutafuta taarifa za ndani kuhusu kesi inayomkabili kiongozi huyo wa zamani.

Hali ya sasa hivi inaonekana pigo kuu kwa Bwana Sarkozy.

Wachunguzi wanajaribu kutafuta iwapo Bwana Sarkozy, mwenye umri wa miaka 59, ambaye alikuwa rais wa Ufaransa kutoka mwaka 2007 hadi 2012, aliahidi kumpa wadhifa mkubwa jaji wa Monaco, Gilbert Azibert, ikiwa ni shukrani ya kupatiwa taarifa kuhusu uchunguzi unaofanyika dhidi kuhusu fedha aliyoitumia katika kampeni ya uchaguzi.

 

 

NAFASI YA UFARANSA KWENYE MAUAJI YA KIMBARI YA RWANDA

Rais Paul Kagame wa Rwanda kwa mara nyingine tena ameinyooshea kidole cha lawama serikali ya Ufaransa kutokana na kile alichosema ni nafasi ya Paris kwenye mauaji ya kimbari ya mwaka 1994 katika nchi yake.

 Akizungumza na waandishi wa habari hapo jana, Rais Kagame alisema Ufaransa inapaswa kukiri makosa yake na kuwaomba radhi Wanyarwanda kutokana na mchango wake kwenye tukio hilo la kuhuzunisha lililosababisha mamia ya maelfu ya watu kuuawa.

Matamshi ya kiongozi huyo yametolewa baada ya kufeli mazungumzo kati yake na Waziri wa Mambo ya Nje wa Ufaransa, Laurent Fabius Mwezi Mei mwaka huu. Rais Kagame amewaambia wanahabari wa ndani na nje ya Rwanda kwamba, mazungumzo pekee hayawezi kutatua hali ya mambo.

 “Kama mazungumzo yangekuwa na uwezo wa kutatua tofauti zilizoko nadhani tungekuwa tumefikia maelewano kitambo.

 Muhimu ni kwa wenzetu kukiri walifanya makosa yao na kuomba radhi” amesema kiongozi huyo. Hali ya kunyooshena kidole cha lawama kati ya Rwanda na Ufaransa kuhusu mauaji ya kimbari ya 1994 imekuwa ikiyumbisha uhusiano wa pande mbili na hali iliwahi kuwa mbaya zaidi mwaka 2006 baada ya nchi hizo mbili kukata kabisa uhusiano wa kidiplomasia na kufunga balozi zao katika miji ya Kigali na Paris.

Inafaa kukumbusha hapa kuwa, mauaji ya Kimbari ya Rwanda yalianza Aprili 6 mwaka 1994 baada ya kuuawa rais wa wakati huo wa nchi hiyo, Juvenile Habyarimana, kufuatia kutunguliwa ndege iliyokuwa imembeba karibu na uwanja wa ndege wa Kigali.

 Rais Habyarimana alikuwa anatoka katika kabila la Wahutu na kuuawa kwake kulisababisha Wahutu wenye misimamo mikali kuanzisha mauaji dhidi ya Watutsi.

 Mauaji hayo yaliyoendelea kwa takriban siku 100 yalisababisha kuuawa zaidi ya watu laki 8; wengi wao wakiwa ni wa kabila la Watutsi.

 Serikali ya Rwanda imekuwa ikishikilia kwamba, Ufaransa ilihusika katika kupanga na kutekeleza mauaji hayo ya kimbari ambayo hadi leo yanaendelea kuwashangaza wengi duniani.