WASAA WA HABARI

SERIKALI YA MAPINDUZI YA ZANZIBAR IMEKABIDHI RASMI HATI YA UMILIKI WA MATUMIZI YA MSIKITI MUHAMMAD (SAW) WA MWANAKWEREKWE
Serikali ya Mapinduzi ya Zanzibar imekabidhi rasmi hati ya umiliki wa matumizi ya Msikiti Muhammad { SAW } uliopo nyuma ya Tawi la Benki ya Kiislamu ya Watu wa Zanzibar {PBZ } uliopo Mwanakwerekwe kwa waumini wa Dini ya Kiislamu wa Mtaa huo ili waendelee kuutumia katika Ibada zao mbali mbali za kila siku. 

Msikiti huo ulikuwa umefungwa kutumika kwa suala lolote la ibada kwa karibu miaka 14 sasa tokea miaka ya 2000 baada ya kutokea hitilafu ya umiliki wa msikiti huo baina ya waumini wa dini hiyo waliokuwa wakiutumia kwa ibada zao. 

Makamu wa Pili wa Rais wa Zanzibar Balozi Seif Ali Iddi akikabidhi hati hiyo kwa waumini hao kupitia kwa Katibu Mtendaji wa Wakfu na Mali ya Amana Zanzibar Sheikh Abdulla Talib na Baadaye Mufti Mkuu wa Zanzibar Sheikh Saleh Kabi ambapo amesema waislamu wasingependa kuona msikiti huo unaharibiwa bila ya kutumika. 

Balozi Seif alisema imesikitisha kuona baadhi ya watu walikuwa wakifanya uchafu ndani ya msikiti huo kwa muda mrefu wakati taratibu na sheria za kiislamu kamwe haziruhusu hata kuingia na viatu ndani ya nyumba hiyo ya ibada. 

Alieleza kwamba Serikali ilifikia uwamuzi wa kuukabidhi msikiti huo kwa waumini wa eneo hilo kufuatia vikao mbali mbali ikiwemo mahkama ya rufaa Tanzania iliyoamua kufuta amri zote zilizohusika na msikiti huo. 

“ Vikao mbali mbali vilivyohusu suala la msikiti huo vilifikia uamuzi wa msikiti huo kutumiwa tena na waumini kutekeleza ibada zao za kila siku “. Alisema Makamu wa Pili wa Rais wa Zanzibar.
Akitoa shukrani kwa niaba ya waumini wa Dini ya Kiislamu wa Mtaa wa Mwanakwerekwe mmoja wa Wazee wa Mtaa huo Sheikh Mwinshehe Othman ameihakikishia Serikali ya Mapinduzi ya Zanzibar kwamba nyumba hiyo ya Mwenyezi Mungu wataisimamia katika masuala ya ibada na si vyenginevyo. 

Hata hivyo Sheikh Mwinshere aliiomba Serikali kupitia Makamu wa Pili wa Rais wa Zanzibar kuiangalia barabara ya kuingia kwenye msikiti huo kutokea bara bara kuu ya mwanakwerekwe ambayo haipitiki kutokana na uchafuzi wa mazingira. 

Alisema ni vyema katika kuunga mkono nguvu za Waumini hao katika kuurejeshea hadhi yake msikiti huo Serikali kupitia Halmashauri ya Wilaya ya Magharibi au Baraza la Manispaa likaweka nguvu zake katika kuifanyia marekebisho bara bara hiyo ili kutoa fursa kwa waumini pamoja na wananchi kuitumia bila ya usumbufu wowote. 

Kamisheni ya Ardhi na Mazingira Zanzibar Tarehe 16 Agosti mwaka 1991 ilitoa hati umiliki wa ardhi ya eneo hilo kutumika kwa ajili ya ujenzi wa Msikiti, Chuo pamoja na Kituo cha Afya yenye kumbu kumbu namba MU/21 – Kiwanja D6 kikiwa na ukubwa wa Square Metre Mia 330.

CHAPISHO LA TATU LA TAARIFA ZA MSINGI ZA KIDEMOGRAFIA,KIJAMII NA KIUCHUMI KUZINDULIWA MEI 25, 2014

Rais wa Jamhuri ya Muungano wa Tanzania Dkt. Jakaya Mrisho Kikwete kuwa Mgeni rasmi katika uzinduzi wa Chapisho la Tatu la Taarifa za msingi za Kidemografia,kijamii na kiuchumi linalotokana na Sensa ya Watu na Makazi ya mwaka 2012 katika ngazi ya Taifa. 

Hayo yamesemwa na Kamishna wa Sensa ya Watu na Makazi ya mwaka 2012 Hajjat Amina Mrisho Said wakati wa mkutano na waandishi wa habari leo jijini Dar es salaam ambapo uzinduzi huo utafanyika Mei 25, mwaka huu katika Ukumbi wa Kimataifa wa Mwalimu Nyerere uliopo Dar es salaam. 

Hajjat Amina alisema kwa kifupi chapisho hilo, linatoa viashiria mbalimbali ambavyo ni pamoja na ongezeko la idadi ya watu,mgawanyo wa watu kwa umri na jinsi,muundo wa kaya,hali ya ndoa,hali ya ulemavu,idadi ya Watanzania wanaoishi nje ya nchi na wale wenye vyeti vya kuzaliwa na wasionavyo. 

Alivitaja viashiria vingine ni vizazi na vifo,uhai wa wazazi,kujua kusoma na kuandika,shughuli zaki uchumi,hali ya makazi,mifuko ya hifadhi ya jamii na umiliki wa vifaa na huduma katika makazi.

Akifafanua zaidi kuhusu siku hiyo Hajjat Amina amesema watu wapatao 500 wanatarajiwa kushiriki katika uzinduzi huo wakiwemo viongozi wa ngazi za juu Serikalini,Mabalozi na Wadau wa maendeleo. 

Hajjat Amina aliongeza kuwaViongozi wengine watakaoshiriki ni wa Dini,vyama vya Siasa na Wawakilishi wa Mashirika yasiyo ya kiserikali Pamoja na wadau wa Takwimu nchini. 

Chapisho la Tatu la Taarifa za Msingi za Kidemografia,kijamii na kiuchumi linalotokana na Sensa ya watu na Makazi ya mwaka 2012 ni mwendelezo wa machapisho mbalimbali yanayotolewa na Ofisi ya Taifa ya Takwimu na Ofisi ya Mtakwimu Mkuu wa Serikali ya Mapinduzi Zanzibar kama ilivyoainishwa kwenye kalenda ya machapisho ya Sensa ya watu na makazi ya mwaka 2012.

KAMPUNI TANO ZINAWANIA LESENI ZA GESI NA MAFUTA TANZANIA

Kampuni tano zimepanda dau la kutaka kununua leseni za kutafuta mafuta na gesi katika himaya ya Tanzania.

Hata hivyo idadi hiyo ni ndogo zaidi kuliko vitalu vinane vilivyokuwa vikinadiwa katika duru hii, TPDC imeeleza.

Tanzania, ambayo imegundua kiasi kikubwa cha gesi ya asili katika mikoa ya kusini, ilitangaza vitalu saba vya maji marefu baharini na kimoja katika Ziwa Tanganyika.

Kampuni ya CNOOC Ltd na Gazprom inayoendeshwa na serikali ya Urusi ni miongoni mwa makampuni makubwa ya kigeni yaliyowasilisha maombi yao katika mzunguko huo wa nne.

Miamba mingine ya nishati Statoil na ExxonMobil, ambayo imegundua kiasi kikubwa cha gesi Tanzania, iliwasilisha maombi ya pamoja kupata kitalu kimoja.

“Mchakato wa kutathmini utaanza mara moja na tutatangaza washindi wa mnada haraka iwezekanavyo kadri muundo wa ushughulikiaji wa leseni unavyoruhusu,” Yona Killagane, mkurugenzi mtendaji wa Shirika la Maendeleo ya Petroli (TPDC) aliieleza Reuters.

Killagane hakusema lini washindi watatangazwa. Muda wa mwisho kuwasilisha maombi ilikuwa Mei 15.

ATC ANGANI KUNG’ARA

SHIRIKA la Ndege Tanzania (ATC) lipo karibu kuanza

kung’ara hewani baada ya mwekezaji kutoka Oman

kuwa tayari kuwekeza kwenye shirika hilo na sasa

anasubiri serikali kukamilisha taratibu zake.

Miongoni mwa taratibu zinazosubiriwa ni kwa serikali

kulipa madeni makubwa ambayo ATC ilikuwa inadaiwa

ili kuweka mizania sawa ya vitabu vya hesabu za fedha.

Mwenyekiti na Rais wa Kampuni za Al Hayat

Development and Investment LLC ya Oman, Sheikh

Salim Bin Abdullah Al Harthy, alisema wana dhamira ya

dhati ya kuwekeza hapa nchini na hasa katika ATC.

“Tunatarajia kuwekeza kwenye maeneo tofauti katika

sekta za mafuta na uendelezaji wa maeneo ya fukwe,

lakini lengo letu kuu ni kuwekeza ATC,” alisema Sheikh

Salim na kuwa awamu ya kwanza watatumia sh, bilioni
160.

“Mpango wetu ni kujenga kituo cha mafunzo ya masuala

ya ndege, ofisi nzuri kwa ajili ya ATC, kununua ndege

na kufanya shughuli nyingine za maendeleo. Tunatarajia

kufanya haya katika kipindi kifupi kijacho," alisema.

Alifafanua kuwa kuna wakati Kampuni ya Al Hayat

ilikaa kimya kuhusu uwekezaji huo na kuwa ilifanya

hivyo ili kutoa nafasi kwa serikali kukamilisha taratibu

zake ikiwemo kupitia makubaliano yaliyofikiwa kati ya
kampuni hiyo na ATC.

Alisema watendaji wa kampuni ya Al Hayat wamekuwa

wakitembelea Tanzania mara kwa mara ili kufuatilia

suala zima katika uwekezaji kwenye ATC.

Sheikh Salim alisema ni kutokana na hali hiyo ndiyo

maana hata ule mpango wa kununua ndege aina ya

Bombadier, Air Bus na Embraer ulisimama kidogo kwa

kuwa mkataba rasmi wa uwekezaji bado haujafikiwa na
kutiwa saini.

Alisema safari hii wamekuja tena kuitikia wito wa ATC ili
kuendeleza makubaliano yaliyofikiwa na kuwa taratibu
zikikamilika watatia saini mkataba na kuanza uwekezaji.

Sheikh Salim alisema suala hili limechukua muda
mrefu kutokana na taratibu husika zinazohusu pande
zote, lakini anasisitiza azma ya kuwekeza iko pale pale

kwa kuwa linahusisha mambo mbalimbali ikiwemo ya
kisheria.
Hata hivyo, anasema kuna uwezekano mkubwa ndani

ya miezi sita tangu sasa kila kitu kitakuwa kimekamilika

na ATC itarudi kung’ara angani kwa kuwa serikali

inatoa ushirikiano mkubwa na wa kutosha.

Kuhusu utoaji wa huduma, Sheikh Salim anasema

lengo ni kuhakikisha inafika katika mikoa mingi kadri

iwezekanavyo na nchi jirani, na kufanya safari za mbali

katika nchi kama Uingereza na India.

Baada ya kukaribishwa na Sultani Qaboos kufanya
ziara Oman, Rais Jakaya Kikwete alikutana na
wafanyabiashara wan chi hiyo na kuwakaribisha kuja

kuwekeza kwenye maeneo mbalimbali.

Hivyo uwekezaji wa Al Hayat umetokana na jitihaza

zilizofanywa na Rais Kikwete katika ziara yake nchini

humo.
Kwa sasa ATC inafanya safari zake katika mikoa ya

Mtwara, Mwanza, Tabora, Kigoma, Dar es Salaam,
Mbeya na katika nchi za Burundi na Comoro.

 Hivi
karibuni itaanzisha safari za Zanzibar na Kilimanjaro.

MAGAIDI WA BOKO HARAM WAUA WATU 30 NIGERIA

Magaidi wa kundi la Boko Haram huko Nigeria wametekeleza jinai mpya ambapo wamewaua watu wapatao 30  kaskazini mashariki mwa nchi hiyo.

Duru zinaarifu kuwa, Jumatatu magaidi wa Boko Haram walivamia kijiji cha Shawa na kuwaua watu 10 na kisha jana Jumanne wakavamia kijiji cha Alagamo na kuwaua watu 20.

 Vijiji hivyo viwili viko karibu na eneo la Chibok ambapo  magaidi hao hao wa Boko Haram waliwateka nyara wasichana wa shule wasiopungua 200. 

Wakaazi wa vijiji hivyo wanasema wanagambo wa Boko Haram pia wameteketeza moto nyumba zao. Hayo yanajiri wakati ambapo jana watu zaidi ya 118 walipoteza maisha kufuatia hujuma ya Boko Haram katika mji wa Jos katikati mwa Nigeria.

Wakati huo huo Jamhuri ya Kiislamu ya Iran imelaani vikali hujuma hiyo ya Jumanne nchini Nigeria.

 Msemaji wa Wizara ya Mambo ya Nje ya Iran Bi. Marzieh Afkham ameelezea kufungamna Iran na familia za walipoteza maisha katika hujuma hiyo ya kigaidi.

 Amesisitiza kuwa Iran inapinga kila aina ya misimamo mikali iliyo dhidi ya ubinaadamu na ametoa wito kwa kurejeshwa amani, usalama na utulivu Nigeria. 

 Kwingineko, Balozi wa Nigeria nchini Iran ameishukuru serikali na watu wa Iran kwa  uungaji mkono wake wa juhudi za kuwaokoa wasichana wa shule waliotekwa nyara na kundi la Boko Haram. 

Al Haj Tukuru Mani ameyasema hayo Jumatano mjini Tehran katika kikao kilichokuwa na  anuwani ya 'Mshikiamano dhidi ya ugaidi na misimamo mikali'.

 Kikao hicho kilihudhuriwa na Makamu wa Rais wa Iran  na baadhi ya maafisa wa wizara ya mambo nje ya Iran.

 Balozi wa Nigeria alisema kuwa kikao hicho ni moja ya nembo za uungaji mkono Iran kwa juhudi za kuwaokoa wasichana wa shule waliotekwa nyara Nigeria.

 Boko Haram ni kundi lenye misimamo ya kufurutu mipaka nchini Nigeria ambalo kutokana na kuwa na ufahamu mbaya na potofu kuhusiana na Uislamu, limeitumbukiza nchi hiyo katika dimbwi la machafuko na mauaji sambamba na kuzusha hitilafu za kidini na kikabila nchini humo. 

 Aidha kundi hilo limetoa kisingizio kwa nchi za Magharibi kutuma wanajeshi na maafisa wa kijasusi nchini Nigeria.

SOMALIA INAKIUKA HAKI ZA WAFUNGWA - HRW

Shirika la kutetea haki za binadamu Human rights watch limeishutumu serikali ya Somalia kwa kuwanyima wafungwa haki za uakilishi wa wakili na kuwashitaki raia wa kawaida chini ya mahakama za kijeshi.

Shirika hilo limesema kuwa mamia ya raia wanahukumiwa kwa sheria kali wasizoelewa. Human rights watch pia imesema kuwa raia wengi wamejikuta matatani baada ya kukamatwa katika msako wa kitaifa unaofanywa na mashirika ya kijasusi ya Somalia na mara nyingie wanazuiliwa kwa muda mrefu bila kufunguiwa mashtaka.

Kuzuiliwa kwa muda mrefu ni tatizo ndogo sana kwa raia hao wa Somalia ikilinganishwa na kufunguliwa mashtaka ya ugaidi na kutishia usalama wa nchi. Ukipatikana na hatia, hukumu ni kifo.

Licha ya kuwa mashirika ya haki za binadamu yamekuwa yakipinga kutolewa hukumu hii, Somalia ni mojawepo ya nchi chache Afrika ambayo bado inatoa huku hiyo.

Wasiwasi mkubwa ni kwamba, washukiwa hawapewi fursa ya kujitetea. 

Na wala mahakama hizi za kijeshi hazihitaji ushahidi mwingi kuamua kuwa una hatia.

Human rights Watch imetaja katika ripoti yao kisa kimoja ambapo zaidi ya kesi 24 zilisikilizwa na kuamuliwa kwa chini ya siku 4.

IRAN NA MAULAMAA WA KISHIA WASISITIZA UDHARURA WA KUKABILIANA NA BOKO HARAM

Makamu wa Rais wa Iran anayeshughulikia masuala ya wanawake na familia amemuandikia barua Naibu Katibu Mkuu wa Umoja wa Mataifa na kulaani hatua ya kutekwa nyara wasichana wa shule nchini Nigeria na kundi la Boko Haram.

 Katika barua yake hiyo kwa Bi Phumzile Mlambo-Ngcuka Naibu Katibu Mkuu wa UN anayeshughulikia masuala ya wanawake, Shahindokht Molaverdi sambamba na kukumbusha pendekezo la Rais wa Iran kwa ajili ya kukabiliana na machafuko na kufurutu ada (WAVE). 

Amesisitiza ulazima wa ulimwengu kukabiliana na vitendo kama hivyo visivyo vya kibinadamu vinavyotekelezwa kwa malengo ya kisiasa ili kuuchafulia jina Uislamu na kuwafanya watu waogope dini hii.

 Barua hiyo pia imetumwa kwa Waziri wa Masuala ya Wanawake wa Nigeria Zainab Bana, Sekretarieti ya Mabunge ya Kiislamu, jumuiya za OIC pamoja na NAM.

Boko Haram ni kundi la wanamgambo wenye misimamo mikali nchini Nigeria na kutokana na kuafuata itikadi potofu wanazodai eti ni za Kiislamu, wanataka shule zote zifungwe na kulazimisha kutumika sharia ya Kiislamu katika majimbo yote 36 ya nchi hiyo.

 Boko Haram kilugha inaamanisha, kitabu na elimu ya Kimagharibi ni haramu, na kundi hilo linaamini kuwa elimu ya Kimagharibu inapaswa kupigwa marufuku nchini humo. 

Kundi la Boko Haram ambalo hadi sasa limefanya vitendo vingi ya kigaidi nchini Nigeria, hivi karibuni liliwateka nyara wasichana wa shule zaidi ya 250 katika kijiji kimoja kilichoko kaskazini mashariki mwa nchi hiyo. 

Kiongozi wa kundi hilo alijitokeza na kudai kuwa, wasichana hao hawapaswi kwenda shule, wanapaswa kuolewa na kwamba Boko Haram wanakusudia kuwauza kama watumwa katika nchi jirani.

HAFTAR ATAKA SERIKALI YA WAKATI WA MGOGORO IUNDWE LIBYA.

Jenerali mstaafu wa Libya, Khalifa Haftar aliyeanzisha vita dhidi ya makundi yenye silaha na kupinga serikali, ametaka mahakama iteue serikali ya wakati wa mgogoro itakayosimamia uchaguzi mpya nchini humo. 

Haftar pia ameituhumu serikali ya mpito ya Libya kuwa inaunga mkono ugaidi na kusema kuwa mapigano dhidi ya wanamgambo wenye silaha yataendelea.

Hayo yanajiri huku spika wa Bunge la Libya akiamuru kukamatwa wanajeshi walioasi na kushiriki katika mauaji ya umati ya raia katika mji wa Benghazi. 

Nuri Abusahmin ambaye pia ni kamanda wa vikosi vyote vya ulinzi vya Libya amesema, serikali inafanya jitihada za kuzuia mapigano zaidi kati ya makundi yenye silaha nchini humo.

Siku ya Ijumaa Jenerali mstaafu Khalifa Haftar alitumia vikosi vya jeshi na helikopta kushambulia makundi ya wanamgambo katika mji wa Benghazi bila ruhusa ya serikali.

 Hii ni katika hali ambayo hadi sasa wanajeshi kadhaa wa Libya wameasi jeshi na kuungana naye.