WASAA WA HABARI LEO ALHAMIS JUNE 5 2014.

LEO NI ALKHAMISI TAREHE 7 SHAABAN MWAKA 1435 HIJIRIA, INAYOSADIFIANA NA TAREHE 5 JUNI MWAKA 2014 MILADIA.

Siku kama ya leo miaka 51 iliyopita inayosadifiana na tarehe 15 Khordad 1342 Hijria Shamsia sawa na tarehe 5 Juni 1963 Milaadia, wananchi Waislamu wa Iran walifanya maandamano makubwa dhidi ya utawala wa Shah, baada ya kusikia habari ya kutiwa mbaroni Imam Khomeini MA. 

Imam alitiwa mbaroni na vibaraka wa utawala wa Shah siku kadhaa nyuma kufuatia hotuba yake ya kihistoria aliyoitoa katika mji wa Qum, ambayo ilifichua njama mbalimbali za utawala wa Shah dhidi ya taifa la Iran.

 Ni wazi kuwa mapambano ya umwagaji damu na ya kihistoria ya tarehe 15 Khordad, yalikuwa nukta ya kuanza mapinduzi ya wananchi wa Iran dhidi ya utawala wa Shah na kufungua njia ya mustakbali wa kisiasa na kijamii nchini.

@@@

Siku kama ya leo miaka 42 iliyopita, sawa na tarehe 5 Juni 1972, lilifanyika kongamano la kwanza la mazingira huko Stockholm nchini Sweden. Kongamano hilo liliwashirikisha wawakilishi 1300 kutoka nchi 113 duniani likiwa na kauli mbiu isemayo 'Kuna Ardhi Moja tu'. Miongoni mwa malengo makuu ya kongamano hilo yalikuwa ni kuwekwa mikakati ya kujenga makaazi ya raia kwa kuzingatia ulindaji mazingira, kuainisha na kudhibiti mada haribifu kwa mazingira na kuhifadhi mazingira kwa ajili ya vizazi vya baadaye.

@@@

Siku kama ya leo miaka 47 iliyopita muwafaka na tarehe 5 Juni 1967, vilianza vita vikubwa vya tatu kati ya utawala wa Kizayuni wa Israel na nchi za Kiarabu. Katika siku kama ya leo kikosi cha anga cha utawala ghasibu wa Israel kilifanya shambulizi la kushtukiza na kuvuka mipaka ya nchi tatu za Misri, Syria na Jordan na kufanya uharibifu mkubwa. Baada ya shambulizi hilo, vikosi vya nchi kavu vya Israel vikiwa na silaha za kisasa na uungaji mkono wa Marekani na Uingereza, vilifanikiwa kuyashinda majeshi ya Misri, Syria na Jordan katika kipindi cha siku sita tu.

WAPINZANI NCHINI TANZANIA WAZIDI KUISAKAMA SERIKALI

Vyama vya upinzani nchini Tanzania vimezidi kuisakama Serikali vikisema kuwa hivi sasa kila mtanzania ana deni la Shilingi 600,000 kutokana na fedha zilizokopwa kuendeshea warsha, semina, safari, mafunzo na matengenezo ya magari.
Vyombo vya habari nchini Tanzania vimemnukuu Waziri Kivuli wa Fedha, James Mbatia akiwasilisha taarifa ya kambi ya Upinzani bungeni na kusema kuwa, deni la taifa limeongezeka kwa Shilingi trilioni 8.2 kwa kipindi cha miezi saba tu na kwamba ukiligawanya deni hilo kwa idadi ya Watanzania milioni 45, kila mwananchi atakuwa anadaiwa Shilingi laki sita (600,000).
Vyombo hivyo vimeongeza kuwa, karibu fedha zote zilizotengwa na Wizara ya Fedha kwa mwaka wa fedha wa 2014/15, zitatumika katika kulipia Deni la Taifa. Vimesema, kati ya Shilingi trilioni 5.8 za bajeti ya Wizara ya Fedha mwaka 2014/15, Shilingi trilioni 4.3 zimetengwa kwa ajili ya kulipia Deni la Taifa.
Wapinzani hao pia wamesema, ingawa serikali ya Tanzania inasema kuwa deni hilo linavumilika, lakini linaonekana kuwaelimia Watanzania kwani hata mapato ya ndani yamezidiwa na matumizi ya kawaida hivyo kuifanya Serikali kukopa hata kwa ajili ya warsha, semina, safari, mafunzo na matengenezo ya magari.

TANZANIA YAWA YA KWANZA AFRIKA MASHARIKI KATIKA USAFIRI WA MABASI YAENDAYO KASI---PINDA.

WAZIRI MKUU Mizengo Pinda  amesema Tanzania ni miongoni mwa nchi za kwanza katika Jumuiya ya Afrika Mashariki kuingia kwenye ubia na sekta binafsi katika mradi mkubwa wa usafirishaji abiria.

Ametoa kauli hiyo leo mchana (Jumanne, Juni 3, 2014) wakati akifungua Mkutano wa Majadiliano yenye lengo la kuutangaza mradi wa mabasi yaendayo kasi kwenye ukumbi wa Mlimani City. Mkutano huo wa siku mbili, utamalizika kesho (Jumatano, Juni 4, 2014).

Waziri Mkuu amesema kutèkelezwa kwa mradi huo kutatoa fursa za ubunifu utakaowezesha kupatikana kwa suluhisho la usafiri mijini na hasa kwenye miji inakua kwa kasi barani Afrika.

"Mbali ya kutoa huduma za hali ya juu, za haraka na ambazo siyo ghali kwa wakazi wa Jiji la Dar es Salaam, nia ya Serikali ni kuona mfumo mpya wa matumizi ya kadi kwenye mpango huu wa usafiri unatumika ipasavyo," alisema.

Alisema ni matumaini ya Serikali kwamba wadau kutoka sekta binafsi ambao ni wazawa na wa kutoka nje ya nchi watashiriki kwenye mradi huu ili uweze kuboresha matumizi ya kadi ambayo mtu hatatakiwa kulipia fedha taslimu akiwa ndani ya basi bali kutumia kadi anayoilipia kabla ya kuingia ndani ya basi husika.

Akizungumza na waandishi wa habari mara baada ya kufungua mkutano huo, Waziri Mkuu alisema Serikali iliamua kuanzisha mradi huo ili kupunguza msongamano wa magari kwenye barabara za Jiji la Dar es Salaam.

"Hii ni awamu ya kwanza ambayo inakaribia kukamilika na inaanzia Kimara hadi Kivukoni na itakuwa na matawi mawili ya Morocco na Karikoo. Mradi wote una awamu sita za ujenzi kuelekea maeneo tofauti ya Jiji," alisema.

Mbali na mradi huo wa mabasi yaendayo kasi, Serikali inaangalia uwezekano wa kutumia usafiri wa majini kwa kutumia boti kati ya Dar es Salaam na Bagamoyo kama njia mojawapo ya kupunguza msongamano wa magari jijini Dar es Salaam.

“Vilevile tutaimarisha usafiri wa reli kama njia nyingie ya kupunguza tatizo hili. Dk. Mwakyembe (Waziri wa Uchukuzi) ameanza na sote tumeona ni jambo linalowezekana. Cha msingi ni kuimarisha tu usafiri huu,” aliongeza Waziri Mkuu.

Akiwakaribisha wajumbe wa mkutano huo, Waziri wa Nchi Ofisi ya Waziri Mkuu (TAMISEMI), Bibi Hawa Ghasia alisema Serikali imedhamiria kuhakikisha kuwa mradi huo unafanikiwa.

Pia alitumia fursa hiyo kuishukuru Benki ya Dunia ambayo alisema imetoa kiasi cha dola za Marekani milioni 200 kwa ajili ya kufadhili mradi huo.

Mkutano huo unawashirikisha wadau mbalimbali wakiwemo wa ndani na wa nje wanaotarajiwa kutoa huduma za mabasi makubwa na madogo, utoaji tiketi, ulinzi, usafi na huduma za maduka.

POLISI IRINGA YASAMBARATISHA MTANDAO WA WAVUTA BANDI

Jeshi  la  polisi  mkoa wa Iringa  limefanikiwa  kuusambaratisha mtandao  wa bangi katika  eneo la Isakalilo mjini Iringa baada ya  kufanikiwa  kukamata mzigo wa bangi  uliokuwa ukiandaliwa.

Kamanda wa  polisi  mkoa wa Iringa Ramadhan Mungi amesema kuwa tukio hilo  limetokea  juzi baada ya  jeshi la polisi kubaini  kuwepo kwa  mtandao huo .

Alisema kuwa wakati polisi  wakijiandaa kuzingira  nyumba hiyo ambayo haijaisha (Pagale)  mmoja kati ya vijana  waliokuwa  wakiiandaa bangi hiyo aliwaona  polisi hao  hivyo kulazimika kuruka  dirishani na kutelekeza bangi hiyo yenye uzito wa kg 10.

Hata  hivyo alisema kuwa hakuna aliyekamatwa japo  polisi wanaendelea na msako  zaidi na  kuwataka  wananchi kutoa ushirikiano  kwa  jeshi hilo la polisi.

                  

WANAWAKE WAENDELEA KUTUPA WATOTO WACHANGA MBEYA.

WIMBI la wanawake mkoani Mbeya kujifungua watoto na kisha kuwatupa na wengine kutoa mimba limezidi kushika kasi na kukithiri baada ya vitendo hivyo kuripotiwa na vichanga kuokotwa kwenye mashimo na mitoni.

Kukithiri kwa vitendo ni baada ya jana Wananchi wa Mtaa wa Mwambenja kata ya Iganzo jijini Mbeya kugundua kutupwa kwa mtoto anayesemekana kuwa na umri usiozidi siku moja jinsia ya kike katika shimo la choo kisichotumika.

Kwa mujibu wa mwenyekiti wa Mtaa huo, aliyefahamika kwa jina la Lukasi Mwakalonge, alisema alipewa taarifa na wananchi wake mchana na kuambiwa kuna katoto kametupwa shimoni na bado ni kazima hali iliyomlazimu kutoa taarifa katika Jeshi la Polisi.

Alisema baada ya kufika eneo la tukio na kugundua kuwa mtoto bado yuko hai wakaamua kumtoa ndani ya shimo huku wakisubiri jeshi la polisi kwa ajili ya hatua zaidi lakini akawa amepoteza maisha muda mfupi baada ya kutolewa ndani ya shimo.

Hata hivyo jeshi la Polisi lilifika eneo la tukio na kuuchukua mwili wa marehemu, vitendo hivyo vya wanawake kutupa watoto kabla na baada ya kujifungia bado vinazidi kutokea hapa nchini ingawa hakuna takwimu sahihi za wanawake waliopatikana na hatia kwa makosa kama hayo.

MABAKI YA MKONGE KUZALISHA SUKARI.

KAMPUNI ya Katani ipo kwenye hatua za mwisho za mazungumzo kuhusu ukubwa wa kiwanda cha kuzalisha sukari kutokana  na mabaki ya mkonge, itakayotumika kwa wagonjwa wenye kisukari.

Hayo yamesemwa na Mkurungezi wa Maendeleo Katani Juma Shamte alipozungumza kwenye semina ya wazi iliyofanyika kwenye viwanja vya Tangamano jinsi wakulima watavyonufaika na mkonge.

Alisema kuwa kwasasa wapo kwenye mazungumzo ya mwisho na kampuni itakayojenga kiwanda hicho nchini kwa ajili ya kuanza uzalishaji wa bidhaa hiyo hapa nchini.

Shamte alisema kiwanda hicho kitakapo kamilika ujenzi wake na kuanza kazi kitawezesha kupungua uhaba wa sukari nchini na nyingine kuuzwa kwenye masoko ya kimataifa.

Kwa upande wa mahitaji kwenye soko la dunia, Shamte alisema uhitaji wa bidhaa za mkonge umezidi kuongezeka kwa zaidi ya asilimia 15 ya bei ukilinganisha na mwaka 2000 ambapo bei ilikuwa chini.

Hata hivyo aliwahimiza wakulima kulima mkonge kwa wingi ili kujiongeza kipato maradufu kutoka na zao hilo kuwa na soko la uhakika ndani ya nchi na hata nje ya nchi.

"Mfumo wa masoko si wa kugawana mapato kwani zao hili linamuwezasha mkulima kupata mapato yake mwenyewe na kampuni ya katani kazi yake ni kumuwezesha mkulima kupata pembejeo pamoja na kumtafutia soko la uhakika la kuuza bidhaa zake,"alisema Shamte.

 

 

 

G7 WAKUTANA BRUSSELS BILA URUSI

Kundi la G7 la nchi zinazoongoza kwa viwanda duniani limetishia kuiwekea Russia vikwazo zaidi kutokana na mgogoro wa Ukraine.
 Taarifa ya kundi hilo linalozijumuisha nchi za Marekani, Canada, Ujerumani, Ufaransa, Uingereza, Japan na Italia imeitaka Moscow kuacha kile ilichokitaja kuwa ni 'kuvuruga hali ya ndani ya Ukraine' au wataiwekea vikwazo zaidi.
Wakati huo huo Rais Barack Obama wa Marekani imeituhumu Moscow kuwa inatumia 'mbinu giza' za karne ya 20 nchini Ukraine, na kuahidi kukabiliana na kile alichodai ni uingiliaji wa Russia huko mashariki mwa Ukraine. Obama amesema hayo huko Brussels anakohudhuria mkutano wa kundi la G7.

SYRIA YAPATA MAFANIKIO KATIKA VIUNGA VYA DAMASCUS

Vikosi vya jeshi la Syria vimepaata mafanikio mapya katika mapambano dhidi ya wanamgambo wanaoungwa mkono na nchi za nje, karibu na mji mkuu Damascus.
Jeshi la Syria limefanikiwa kudhibiti eneo la kaskazini na mashariki mwa nji wa Mleha, baada ya kupambana kwa siku kadhaa na magaidi.
Wakati huo huo vikosi vya serikali ya Syria vimewafurusha wanamgambo wenye silaha katika maeneo ya pambizoni mwa miji ya Homs, Daraa, Lattakia na Idlib, mafanikio yanayohesabiwa kuwa kipigo kikubwa kwa magaidi hao wanaoungwa mkono na nchi za kigeni dhidi ya maficho yao.
Wakati huo huo mmoja wa wagombea wa uchaguzi wa rais wa Syria amempongeza Rais Bashar al Assad kwa kushinda uchaguzi huo na kutangaza kuwa yupo tayari kushirikiana naye. Hassan Abdullah al Nouri leo amempongeza Rais Assad kwa kushinda katika uchaguzi huo wa Jumanne na kusema kuwa, hatua inayofuata baada ya uchaguzi ni kushirikiana kwa lengo la kuijenga nchi.
Bashar al Assad ameshinda uchaguzi wa rais wa Syaria kwa kupata asilimia 88.7 ya kura za wananchi.

UN YATIWA HOFU NA KUENDELEA MACHAFUKO S/KUSINI

Ban Ki-moon Katibu Mkuu wa Umoja wa Mataifa amelaani kuendelea umwagaji damu nchini Sudan Kusini kutokana na kutoheshimiwa makubaliano ya usitishaji vita na kuzitaka pande hasimu za mgogoro wa nchi hiyo kuacha operesheni zote za kijeshi na kushikamana na ahadi za huko nyuma.
 Ban amesema hayo katika mazungumzo yake ya simu na Rais Salva Kiir wa nchi hiyo. 
Aidha katibu Mkuu wa Umoja wa Mataifa  ameelezea wasiwasi wake kutokana na kuendelea uadui ambao ni kinyume na makubaliano ya Januari 23 ya kuacha uadui,  na pia makubaliano ya Mei 9 yaliyotiwa saini kati ya Rais Salva Kiir na makamu wa rais wa zamani wa Sudan Kusini Riek Machar.
Mapigano nchini Sudan Kusini yamepelekea maelfu ya watu kuuawa na zaidi ya watu milioni 1.3 kuwa wakimbizi.
Umoja wa Mataifa huko nyuma ulisema pia kuwa, kuheshimiwa usitishaji mapigano ni muhimu ili kuboresha hali mbaya ya kibinadamu inayoshuhudiwa katika nchi hiyo.