WASAA WA HABARI LEO JUNE 2 2014

CUF YAFANYA UCHAGUZI WAKE WILAYA YA MJINI

Chama cha Wananchi CUF leo kimeendelea na uchaguzi wake  ngazi ya Wilaya kuwachagua viongozi mbali mbali wakiwemo Makatibu wa Wilaya, Wenyeviti pamoja na wajumbe wa mkutano mkuu Taifa.

Viongozi wengine wanaochaguliwa ni wajumbe wa kamati tendaji  pamoja na wajumbe wa viti maalum ngazi ya Wilaya.

Akifungua mkutano mkuu wa uchaguzi Wilaya ya Mjini unaofanyika ukumbi wa Basra Mtoni Kidatu, Naibu Katibu Mkuu wa CUF Zanzibar Hamad Massoud Hamad, amesema viongozi wote watakaochaguliwa wana umuhimu mkubwa kwa maendeleo ya chama hicho ngazi ya Taifa.

Hivyo amewataka wajumbe wa mkutano huo kuwa makini katika uchaguzi huo, ili kuwachagua viongozi watakao kuwa tayari kukitumikia chama, na kuepuka kuwachagua viongozi kwa sababu ya kujuana.

Amesema lengo la chaguzi hizo ni kuimarisha na kujenga chama kwa kufuata misingi ya demokrasia, na kuwasisitiza wajumbe hao kutochagua viongozi wenye makundi, misimamo ndani ya chama, na badala yake wachague viongozi majasiri na walio tayari kujitolea, ili kukiwezesha chama hicho kupata ushindi katika uchaguzi mkuu wa mwaka 2015.

Mhe. Hamad Massoud ambaye ni mwakilishi wa Jimbo la Ole (CUF), ametanabahisha kuwa iwapo wajumbe wa mkutano huo watawachagua viongozi wasio kuwa na sifa, baraza kuu la uongozi linayo mamlaka ya kutengua uamuzi huo na kuitisha chaguzi nyengine.

Katibu Mkuu wa CUF Mhe. Maalim Seif Sharif Hamad, nae ameungana na wajumbe wa mkuano huo wa CUF Wilaya ya Magharibi, kuchagua viongozi wa Wilaya watakao kiongoza chama hicho kwa kipindi cha miaka mitano ijayo.

Uchaguzi huo unaendelea katika Wilaya za Magharibi, Kaskazini “B”, Kati na Kusini Unguja, baada ya kukamilika kwa chaguzi hizo katika Wilaya zote nne za Pemba na mbili za Unguja, hatua ambayo inakamilisha chaguzi hizo kwa Wilaya zote za Zanzibar.

Mchakato wa uchaguzi huo utaendelea kesho kwa wajumbe wa mkutano mkuu Taifa kuchukua fomu kwa ajili ya kugombea kuchaguliwa katika baraza kuu la uongozi Taifa.

TANZANIA YAWAKAMATA WASHUKIWA 16 WA AL-SHABAAB KWA MASHAMBULIZI YA MABOMU ARUSHA

Jeshi la polisi nchini Tanzania limewakamata washukiwa 16 wanaohusishwa na mashambulizi ya hivi karibuni ya mabomu mjini Arusha ambayo yaliwaua watu watano.

Mkurugenzi wa Upepelezi wa Jinai, Isaya Mngulu, alisema washukiwa hao walihusishwa na kundi la kigaidi la al-Shabaab.
"Bado operesheni inaendelea kwani kuna washukiwa wengi wanaohusishwa na mashambulizi ya mabomu yaliyotokea Arusha ndani ya kipindi cha mwaka mmoja uliopita," Mngulu aliwaambia waandishi wa habari.
Washukiwa hao walipelekwa mara moja kwenye Mahakama ya Hakimu Mkaazi wa Arusha ambako walisomewa mashtaka 16, likiwemo la kujaribu kuua na kuwachochea vijana wajiunge na al-Shabaab.
Kesi hiyo imeahirishwa hadi tarehe 11 Juni.

                        

POLISI YATOA TAARIFA YA VIFO VILIVYOTOKEA MWISHONI MWA JUMA DODOMA.

Watu wawili wamepoteza maisha kutokana na ajali mbili zilizotokea  katika maeneo mawili tofauti na nyakati tofauti Mkoani Dodoma.

Kamanda wa Polisi Mkoa wa Dodoma Kamishna Msaidizi Mwandamizi wa Polisi DAVID MISIME – SACP ameeleza kuwa, ajali ya kwanza ilitokea tarehe 30/05/2014 majira ya saa 18:30hrs katika kijiji cha Ipala Wilaya ya Dodoma ambapo gari lenye namba za usajili DFP 614 Toyota Land Cruiser mali ya chuo cha Serikali za Mitaa Hombolo likitokea chuoni kuelekea Dodoma mjini likiendeshwa na ALFRED  MLIGO, MIAKA 35, MHEHE, liliacha njia na kupinduka na kusababisha kifo chake.

 Pia watu watano walipata maumivu mbalimbali na walitibiwa na kuruhusiwa. 

Mwili wa marehemu upo katika Hospitali ya rufaa ya Mkoa wa Dodoma kusubiri taratibu nyingine.

Kamanda MISIME AMESEMA ajali ya pili imetokea majira ya saa 18:45hrs huko katika kijiji cha SILWA barabara ya Dodoma – Morogoro ambapo gari lenye namba za usajili T.150 CWA Toyota Granvia Station Wagon likiendeshwa na MGENI S/O SHEMAKAME, MBONDEI, MIAKA 29 MKAZI WA MBURAHATI DSM liliacha njia na kusababisha kifo cha GEORGE S/O TYSON, MIAKA 39, MWONGOZAJI WA FILAMU, Mkazi wa mbezi DSM. 

Mwili wa marehemu umehifadhiwa katika Hospitali ya Wilaya ya Gairo ukisubiri taratibu za Polisi na wanandugu.

Pia katika ajali hiyo wanahabari wanne (4) wa Mboni show walipata majeraha mbalimbali na kutibiwa na kuruhusiwa, ambao ni:-

1.   NIXON KABUMBILE, MHAYA, MIAKA 31

2.   GRACE MEENA, MCHAGA, MIAKA 28

3.   NTWA KABOLE, MNYAKYUSA, MIAKA 33

4.   JUSTINE BAYO, MIAKA 27, MMASAI

Uchunguzi wa awali unaonyesha ajali zote mbili zimesababishwa na mwendokasi. 

Kamanda MISIME ametoa wito kwa madereva kuepuka mwendokasi na kuwa na udereva wa kujihami ambao unasaidia dereva kusimama bila kusababisha madhara linapotokea jambo lolote na hata kama ajali ikitokea madhara hayawezi kuwa makubwa kama yanavyokuwa anapokuwa kwenye mwendo wa kasi

TANAPA YATOA UFAFANUZI JUU YA MADAI YA KAMBI RASMI YA UPINZANI BUNGENI.

MENEJA Mawasiliano wa Shirika la Hifadhi za Taifa ,Paschal Shelutete ametoa ufafanuzi wa juu ya madai ya kambi rasmi ya Upinzani Bungeni kuhusu tuhuma za Ufisadi dhidi ya Mbunge wa Kigoma Kaskazini Zitto Kabwe.

Ufafanuzi huo unakuja siku chache baada ya msemaji  wa kambi  rasmi ya  Upinzani  Bungeni kupitia Waziri wake kivuli wa  wizara  ya  Habari,Michezo,Vijana  na  utamaduni  kudai Zitto alihusika kinachotajwa ufisadi  katika  shirika  la  TANAPA  na  NSSF.

Shelutete  amesema TANAPA linakitambua  kiasi  hicho  kilichotajwa  na  wapinzani  na  kwamba  fedha  hizo ilikuwa  ni  malipo  ya  wasanii  wa   Leka Dutigite   ambao  walifanya  kazi  ya  kuitangaza   Hifadhi ya Saadan.

 

“Leka Dutigite ilifika Hifadhi ya Saadan na kuitangaza kupitia kazi za sanaa... sikumbuki ni lini lakini walifanya kazi na DvD zake zipo."Alisema Shelutete.

“Ifahamike si Leka Dutigite pekee, tunafanya kazi na wasanii mbalimbali kutangaza vivutio, mbuga na hifadhi zetu,”aliongeza  Shelutete .

Kwa upande wao NSSF kupitia kwa Meneja Kiongozi wa Idara ya Uhusiano na Huduma kwa Wateja , Eunice Chiume amesema kuwa pesa walizozitoa kwa kundi hilo zilikuwa malipo ya kutengenezea wimbo maalumu wa shirika hilo na nyingine ni za udhamini wa onyesho lililofanyika mwaka jana mkoani Tanga.

“Kweli mara ya kwanza tuliwalipa Sh25 milioni wasanii wa kundi hilo ili watutengenezee wimbo na Sh56 milioni zilikuwa za udhamini wa onyesho lao, lakini kwa masharti ya kututangaza jambo ambalo lilikuwa na mafanikio kwetu kwani tumefanikiwa kupata wateja wapya 30,000 kutoka sekta isiyo rasmi,” alisema Chiume.

Alisisitiza kuwa wametumia kiwango hicho cha pesa ili kujitangaza kwa kuwa hata mashirika ya kijamii yanapaswa kufanya hivyo ili kuvutia wateja wengi zaidi

MAKASISI WALIOTEKWA NYARA WAACHILIWA.

Kituo cha uhamiaji kati ya mpaka wa Cameroon na Nigeria

Makasisi wawili kutoka nchini Italy pamoja na mwanamke mmoja raia wa Canada waliotekwanyara na kundi la Boko Haram nchini Cameroon wameachiliwa huru.

Idara ya mawasiliano nchini Cameroon imesema watatu hao wako katika afya nzuri na wameabiri ndege inayoelekea katika mji mkuu wa Younde.
Walipelekwa kazkazini mwa taifa hilo karibu na mpaka na Nigeria.
Majina ya makasisi hao ni Giampaolo Martana na Giantonio Allegri.

WAHANGA WA MAUAJI YA BOKO HARAMU WAONGEZEKA
Idadi ya wahanga wa shambulizi la jana la kundi la Boko Haram katika mpaka wa Nigeria na Cameroon, imeongezeka na kufikia watu 42.
 Kwa mujibu wa habari zilizothibitishwa na maafisa usalama nchini Nigeria, watu wasiopungua 42 waliuawa katika shambulizi hilo jipya lililofanywa na wanachama wa kundi hilo katika vijiji vya Kanari, Wazarde na Gula katika jimbo la Borno, la kaskazini mashariki mwa nchi hiyo.
 Inaelezwa kuwa vijiji hivyo viko katika eneo la Gamboru karibu na mpaka wa nchi hiyo na Cameroon ambapo mwanzoni mwa mwezi uliopita kundi hilo lilifanya mauaji ya kutisha dhidi ya watu wasiopungua 300.
Mashuhuda wameeleza kuwa, watu wenye silaha wanaosadikiwa kuwa wanachama wa Boko Haram na ambao walikuwa katika malori yaliyokuwa yamebeba silaha na mada za miripuko walivamia vijiji hivyo na kuviteketeza kwa moto, ambapo mbali na kuua idadi kubwa ya watu, walijeruhi mamia ya wengine. Mashambulizi hayo yaliendelea kwa muda usiopungua masaa saba, na cha kushangaza ni kuwa hakuna askari yeyote wa serikali aliyefika eneo hilo.
 Hali hiyo imewafanya asilimia kubwa ya Wanigeria kuamini kuwa mashambulizi hayo yanafanyika kwa baraka za maafisa usalama wa nchi hiyo.

WAASI WA ANTI-BALAKA JAMHURI YA AFRIKA YA KATI WAHARIBU MSIKITI

Huku machafuko yakizidi kushika kasi nchini Jamhuri ya Afrika ya Kati, kwa mara nyingine tena, waasi wa Kikristo wa Anti-Balaka wamevamia msikiti mmoja mjini Bangui na kuuharibu kabisa.
 Hii ni katika hali ambayo hivi karibuni pia kanisa moja mjini humo lilishambuliwa na watu wenye silaha wanaosadikiwa kuwa na mafungamano na waasi hao na kufanya mauaji dhidi ya watu wasiopungua 30 akiwemo padri wa kanisa hilo.
 Kufuatia kuongezeka wimbi la vitendo vya ukatili nchini humo, Baraza la Usalama la Umoja wa Mataifa, sambamba na kutoa tamko kuhusiana na suala hilo, limeyataka makundi yanayohusika katika vitendo hivyo, kuweka chini silaha na kufuata mkondo wa amani nchini humo.

Katika ripoti hiyo Baraza la Usalama la Umoja wa Mataifa limeitaka serikali ya Rais Catherine Samba-Panza wa Jamhuri ya Afrika ya kati, kuwachukulia hatua kali na za haraka wahusika wa vitendo hivyo.

 Vile vile Msemaji wa Shirika la Umoja wa Mataifa la Kuhudumia Wakimbizi UNHCR amelaani shambulizi hilo dhidi ya kanisa mjini Bangui, na kuyataja machafuko hayo ya hivi karibuni kuwa ni dalili za kuzorota hali ya usalama nchini humo.

 Adrian Edwards amelaani mashambulizi dhidi ya maeneo ya ibada ambayo ndio maeneo yaliyosalia kwa ajili ya kuwahifadhi wakimbizi na kutaka kukomeshwa mashambulizi hayo mara moja.

Hayo yanajiri katika hali ambayo, wakazi wa mjini Bangui, wamefanya maandamano makubwa mjini humo wakimtaka Rais Panza ajiuzulu kutokana na kile wanachodai kuwa ni kushindwa serikali yake ya mpito kumaliza machafuko nchini mwao.