SAUDI ARABIA YATANGAZA MUUNGANO WA KIJESHI WA KIISLAMU.

Saudi Arabia imesema nchi 34 zimekubaliana kuunda muungano wa kijeshi wa kiislamu kupambana dhidi ya ugaidi ambapo operesheni za pamoja zitakuwa zikiratibiwa kutoka mji mkuu wa Saudi Arabia, Riyadh.

Tangazo hilo limechapishwa na shirika la habari la Saudi Arabia na kuongeza muungano huo utaongozwa na nchi hiyo na umeanzishwa kwa sababu ugaidi unapaswa kukabiliwa kwa kutumia kila njia na ushirikiano huo utakuwa njia mwafaka utakao uangamiza.

Taarifa hiyo inasema Uislamu unapinga ufisadi na maangamizi na ugaidi unakiuka hadhi na haki za binadamu hasa haki ya kuishi na kuwa salama. Miongoni mwa nchi zitakazoshiriki katika muungano huo ni Pakistan, Uturuki, Misri, Libya na Yemen. Mali, Chad, Somalia na Nigeria pia ni wanachama wa muungano huo mpya wa kupambana dhidi ya ugaidi.

Hasimu wa muda mrefu wa Saudi Arabia, Iran haijajumuishwa katika muungano huo. Saudi Arabia na Iran zimekuwa zinayaunga mkono makundi tofauti katika mizozo ya Yemen na Syria. Oman pia haijashirikishwa katika muungano huo wa kijeshi.