WASAA WA HABARI LEO JUMATATU 16.6.2012

PETE WAANZISHA MRADI WA UFUGAJI VIPEPEO

Wananchi wa kijiji cha pete wameamuwa kuanzisha mradi wa ufugaji wa vipepeo ili kuweza kujiajiri na kuondokana na umasikini.

Wakizungumza na chuchu fm ali amer simai ambae ni miongoni mwa wafugaji wa vipepeo amesema lengo la kuazishwa mradi huo ni kupunguza uharibifu wa misitu ambao ni rasilimali ya taifa.

 Amesema ufugaji wa vipepeo unafaida kubwa hususan kipindi cha mvua ambapo vipepeo huzaliwa kwa wingi.

Amewataka wananchi wa kijiji hicho hasa vijana kujikita katika mradi huo ili kuweza kuondokana na ukosefu wa ajira na kuepukana na uharibifu wa msitu kwa kukata miti.

Nae Fred Stamila ambae ni mnunuzi wa vipepeo amesema mradi huo umekuwa ukiwanufaisha wananchi wanaojishughulisha na ufugaji huo kwa kuendeleza familia zao katika mahitaji mbalimbali.

Mradi wa vipepeo umeanzishwa mwaka 2004 kwa lengo la kuulinda na kuutunza msitu wa taifa wa jozani ambapo wananchi wa maeneo hayo na maeneo jirani walikuwa wakiuhujumu kwa kukata miti kwa ajili ya shughuli mbalimbali za kijamii.

WANANCHI WA KASKAZINI B WAILALAMIKIA ZAWA

wananchi  wa  shehiya  ya  kilombero,   wilaya   ya  kaskazini  b   unguja ,wameilalamikia  mamlaka  ya  maji  zawa,kutokana  na  kukosa  huduma  ya maji  katika  kijiji  chao.

wakizungumza na  chuchu  fm  wananchi  hao,wamesema  ni  muda  mrefu  kwa  sasa  wamekuwa  waki ihangaikia  huduma  hiyo,kitu  ambacho   kinawapelekea   kuchukua   umbali  wa  maili  tatu  kuelekea  vijiji  vya  jirani.

nae  sheha  wa  shehiya  hiyo   ya  kilombero ,amour   foum   khamis  amethibitisha   kuwepo  kwa  tatizo  hilo,   na  kuiyomba  serekali   iwatafutie  ufumbuzi  wa haraka  ili huduma  maji  kupatikana kijijini  hapo.

NAPE: LENGO LA UKAWA NI KUFICHA MIGOGORO CHADEMA

KATIBU wa NEC, Itikadi na Uenezi, Nape Nnauye, ametoboa siri kwamba, viongozi wa ngazi ya juu wa Chadema wamelazimika kukumbatia kinachoitwa Umoja wa Katiba ya wananchi (UKAWA), ili kujaribu kupoza migogoro iliyopo ndani ya chama hicho ambayo inakiua.

Amesema, siyo kweli kwamba Katibu Mkuu wa Chadema, Dk. Woilbrod Silaa na Mwenyekiti wa Chama hicho Freeman Mbowe wanahangaika na muungano huo unaoitwa wa kutafuta Katiba ya Wananchi (UKAWA) kwa lengo la kusaidia wananchi bali ni kujaribu kupoza makali, baada ya kuona kwamba chama chao kimo katika mgogoro mkubwa wa ndani ambao si mda mrefu utaua.

"Chadema wapo katika mgogoro mkubwa kutokana na baadhi ya viongozi wake hasa wa ngazi za juu kukiendesha chama katika misingi ya ubaguzi.. na ndiyo sababu leo au hata kesho, Mbowe hawezi kuitisha kikao cha Baraza Kuu la chama hicho, na akijaribu kufanya hivyo anatimuliwa", alisema Nape.

Nape pia hakumuweka kiporo Mbunge wa jimbo la Ubungo, John Mwinyika, badala yake alimpasha kwenye mkutano huo kwamba, baada ya wananchi wa jimbo hilo kudanganyika na kumpa ubunge, sasa akae mkao wa kuondoka baada ya uchaguzi mkuu utakaofanyika 2014.

"Mnyika na Chadema yake tunawambia pango lao hapa jimbo la Ubungo  linamalizika rasmi mwaka 2014 na hatuma mpango wa kumuongezea, kilichobaki sasa ajiandae tu kuondoka taratibu", alisema Nape.

Alisema, Mnyika kama walivyo wabunge katika maeneo ambako wananchi walijaribu kuwachagua wapinzani, anachofanya yeye na Chama chake cha Chadema ni kupambana na kujenga misingi ya chama chao kuendelea kuwa kuishi na kamwe hawashughulikii matatizo ya wananchi.

"Na hili niliwaambia miaka mingi iliyopita, nilisema hapa ubungo kwamba mkimchagua mpinzani kazi yake itakuwa kutafuta njia za kuimarisha chama chake, na kamwe hataweza kujihusisha na masuala ya maendeleo yenu", alidai Nape na kuongeza;-

"Mnyika kama kweli una lengo la kuwatumikia wananchi wa Ubungo, umefika wakati wa kuacha sasa na mambo ya kudai kila mara hoja binafsi bungeni, sasa udai na hoja za wananchi, maana ukiendelea kudai hoja binafsi zaa wananchi utadai lini?"

Alisema, ni kutokana na wapinzani akiwemo Mnyika na chama chake cha Chadema, kutokwa mapovu midomoni kila kona ya nchi wakihangaika na Katiba mpya, tena wanachozungumzia zaidi serikalikali tatu na kusingizia kwamba ndiyo mahitaji ya wananchi huku wakijua wazi kwamba wanachohitaji wananchi kama wa Ubungo ni maji, elimu na afya na siyo idadi ya serikali.
 
Nape alisema hivi sasa wananchi wameshastukia vyama vya upinzani kwamba vipo kwa maslahi ya wachache ni si ya wananchi kama vinavyovyojinadi.

Alisema, miongoni mwa dalili za wananchi kuvistukia vyama cya upinzani, ni hali ilivyojitokeza wakati wa ziara za Katibu Mkuu wa CCM, Abdulrahman Kinana alkizofanya akiambatana na Nape mwenyewe mikoani.

Nape alisema, katika ziara hizo hadi sasa wanachama  12, 430 walijiunga CCM huku karibu nusu yao wakiwa wametoka katika vyama vya upinzani vikiwemo Chadema na CUF.

Katika mkutano huo ulioandaliliwa na Jumuia ya Wazazi mkoa wa Dar es Salaam, Nape alipokea wanachama wapya 480, wengi wao wakiwa wamehamia CCM kutoka katika vyama vya Chadema na CUF kwa nyakati tofauti.

CUF KINAENDELEA NA MAANDALIZI YAKE KWA AJILI YA MKUTANO MKUU TAIFA

Chama Cha Wananchi CUF kinaendelea na maandalizi yake kwa ajili ya Mkutano Mkuu Taifa utakaoambatana na uchaguzi wa viongozi wakuu wa Kitaifa wa Chama hicho.
Akizungumza na waandishi wa habari katika ofisi kuu za Chama hicho Buguruni Dar es Salaam, Katibu Mkuu wa Chama hicho Maalim Seif Sharif Hamad amesema maandalizi yote ya msingi kwa ajili ya mkutano huo yamekamilika. 

Maalim Seif amesema katika mkutano huo unaotarajiwa kufanyika tarehe 23 hadi 27 mwezi huu, wajumbe wa mkutano watapokea taarifa mbali mbali za kazi za chama kuanzia mwaka 2009 hadi 2014 ambapo pia watapata fursa ya kuzijadili. 

Amebainisha kazi nyengine za mkutano huo kuwa ni pamoja na kuwachagua viongozi wakuu wa kitaifa wa chama hicho ambao ni Mwenyekiti wa Taifa, Makamu Mwenyekiti na Katibu Mkuu.
Viongozi wengine watakaochaguliwa katika mkutano huo ni wajumbe wa Baraza Kuu la uongozi taifa pamoja na wajumbe wa viti maalum vya wanawake. 

Maalim Seif amesema kwa sasa Chama hicho kinaendelea na vikao mbali mbali kikiwemo cha kamati tendaji, ikiwa ni maandalizi ya mwisho kwa ajili ya mkutano huo ambapo wajumbe wote wa mkutano kutoka Tanzania Bara na Zanzibar watakuwa wamewasili ifikapo tarehe 22/06/2014 kwa ajili ya mkutano huo wa kitaifa. 

Wakati huo huo Mwenyekiti wa Chama hicho Taifa Prof. Ibrahim Lipumba ameichambua bajeti ya Serikali ya Jamhuri ya Muungano wa Tanzania kwa mwaka wa fedha 2014/2015, na kusema kuwa ina mapungufu mengi.
Prof. Lipumba amewaambia waandishi wa Habari kuwa bajeti ikiwa nyenzo muhimu ya sera za serikali, inapaswa kuandaliwa kwa umakini ili iweze kutekelezwa kwa mujibu wa mahitaji yaliyopo. 

Amesema ni jambo la kushangaza kuona bajeti inayoidhinishwa katika bunge kila mwaka haitekelezwi kama ilivyopangwa, na badala yake kunakuwa na tofauti kubwa kati ya bajeti inayoaishinishwa na ile inayopatikana kwa matumizi ya mwaka. 

Amesema baadhi ya Wizara za Serikali zimekuwa zikipata fedha chini ya asilimia 50 ya matumizi yaliyopangwa, na kusababisha miradi mingi ya maendeleo kuzorota kutokana na ukosefu wa fedha.
Aidha amesema bajeti hiyo bado inabakia kuwa tegemezi kutokana na mapato ya ndani kuwa madogo ikilinganishwa na matumizi ya kawaida ya serikali. 

Prof. Lipumba amefahamisha kuwa serikali inapaswa kujipanga ipasavyo, ili kuepuka utegemezi kwa bajeti ya maendeleo ambapo amesema imekuwa ikitegemea zaidi misaada na mikopo kutoka nchi za nje na mashirika ya Kimataifa.

 Ametaja mambo ya msingi yanayopaswa kuzingatiwa wakati wa utayarishaji wa bajeti kuwa ni pamoja na bajeti kuweza kufikia malengo ya uchumi mpana, ukuaji wa pato la taifa, mfumko wa bei, akiba ya fedha za kigeni pamoja na thamani sarafu. 

Mambo mengine aliyobainisha ni ni kutaka matumizi yagawiwe kulingana na malengo ya sera ya taifa pamoja na kujenga mazingira ya utekelezaji mzuri wa bajeti. 

Katika hatua nyingine Prof. Lipumba amesema bado bajeti hiyo haijaweka bayana juu ya ukuwaji wa deni la Taifa ambalo amesema limekuwa likikuwa kwa asilimia 20 kwa mwaka wakati ukuaji wa uchumi ni asilimia 7 kwa mwaka. 

Amesema deni hilo ni hatari kwa Taifa na linapaswa kuwekewa mikakati imara ili lisiendelee kuongezeka na kudumaza pato la wananchi.
Amesema licha ya serikali kusema bajeti imelenga kupunguza gharama za maisha kwa wananchi, lakini wananchi walio wengi bado wanaona kuwa gharama za maisha zinaendelea kupanda kwa kasi kubwa kuliko takwimu zinazotolewa na serikali.

MRADI WA PROSPER KURUDISHA SHULENI WATOTO WALIOKOSA ELIMU SIKONGE WAPONGEZWA

 MWENYEKITI wa halmashauri ya wilaya ya Sikonge mkoani Tabora Robert
Kamoga amepongeza jitihada zinazofanywa na mradi wa PROSPER katika
kutokomeza utumikishwaji watoto katika shughuli za kilimo huku akisifu
utaratibu wa kurudishwa shule watoto wote waliokosa nafasi hiyo. 

 Kamoga ametoa pongezi hizo alipokuwa akizungumza na mamia ya wananchi
waliojitokeza katika maadhimisho ya siku ya kupinga utumikishwaji
watoto iliyofanyika kimkoa katika kijiji cha Udongo kata ya Ipole
wilaya ya Sikonge mkoani Tabora.

 Alisema mradi huu unastahili kupongezwa kwa sababu mkoa wa Tabora ni
miongoni mwa mikoa 5 inayoongoza kwa umaskini hapa nchini na asilimia
kubwa ya wananchi wake ni maskini hali inayochangia watoto wengi
kutumikishwa katika kazi ngumu kwa ujira mdogo. 

 Mradi huu ni mkombozi kwa watoto wadogo kwa sababu wazazi wengi
walikuwa hawawapeleki shule kwa kisingizio cha umaskini na badala yake
wanawapeleka shambani wakawasaidie kulima tumbaku au kuchunga ng’ombe,
alisema. 

 Kamoga aliongeza kuwa utumikishwaji watoto ni hatari sana katika
ustawi wao kwa sababu huwakosesha fursa mbalimbali katika makuzi yao
ikiwemo haki ya kupata elimu na malezi bora. "Wataalamu wanasema ukimnyima mtoto haki zake anaathirika kisaikolojia
mpaka ukubwani mwake na watoto ndio taifa la leo na kesho, hivyo
wanapaswa kulindwa, kutunzwa na kupendwa, kwa kufanya hivyo tutakuwa
tunajenga taifa kuanzia ngazi ya familia mpaka taifa, alifafanua. 

 Aidha alisema sheria ya mtoto namba 21 ya mwaka 2009 kifungu cha 78 (1)
inakataza mtu yeyote kuajiri au kutumikisha watoto katika shughuli
yoyote ile inayowaadhili watoto hao, hivyo kumtumikisha ni kwenda
kinyume na sheria za nchi anapaswa kushitakiwa mara moja. 

 Kamoga alisema PROSPER imefanikiwa kuwarudisha shuleni watoto wengi
sana waliokosa elimu katika wilaya za Sikonge na Urambo na
kuwagharamiwa masomo yao kuanzia darasa la kwanza mpaka la saba huku
vikundi mbalimbali vya vijana na akina mama vikipewa mafunzo ya
ujasiriamali, kilimo, ufugaji na mikopo kwa lengo la kuwawezesha
kiuchumi. 

 Mradi huu umefanya kazi nzuri sana katika vijiji 20 vilivyoko katika
wilaya hizo, Mkurugenzi (Bahati Nzunda) naomba uangalie uwezekano wa
kupanua huduma hii katika vijiji vingine kwani wapo watoto wengi sana
walioathiriwa na utumikishwaji huu, aliongeza. 

 Ili kudhibiti vitendo hivyo, Kamoga aliagiza waalimu wakuu wa shule
zote za msingi katika wilaya hiyo kuhakikisha wanafuatilia mahudhurio
ya watoto shuleni ili kubaini watoto wasiofika shule ili wazazi wao
wakamatwe mara moja na kutozwa faini. 

 Sambamba na hilo aliagiza watendaji wote wa halmashauri kuanzia ngazi
ya vijiji na kata kuwachukulia hatua kali watu wote watakaobainika
kujihusisha na vitendo vya utumikishwaji watoto katika maeneo yao huku
akiomba asasi zingine kuunga mkono jitihada hizo.

SAUDI ARABIA YAKATAZA VIBARUA JUANI

Sheria mpya za kazi zimeanzishwa nchini Saudi Arabia kwa watu wanaofanya kazi nje, kwenye jua.

Kutoka sasa hadi September, vibarua hawaruhusiwi kufanya kazi nje kutoka saa 6 mchana hadi 9 jioni, kwa sababu ya masilahi ya afya yao.
Wafanyakazi kwenye mitambo ya mafuta na kazi za lazima za ukarabati, hawahusishwi na uamuzi huo ikiwa hatua zinachukuliwa kuwakinga na jua.
Nchi jirani ya Qatar, imelaumiwa sana kwa kuwalazimisha vibarua kutoka India kufanya kazi kutwa nje, wakijenga mwahala mwa mashindano ya kandanda ya mwaka wa 2022.
Imesema itachukua hatua kufanya mazingira yao ya kazi kuwa bora.

SADIQ AL-MAHDI AFUNGULIWA SUDAN

Wakuu wa Sudan wamemuachilia huru kiongozi wa chama kikuu cha upinzani, Sadiq al-Mahdi, ambaye alikamatwa mwezi May kwa mashtaka ya kuchochea chuki dhidi ya taifa.

Adhabu ya mashtaka hayo yanaweza kuwa kifo.
Bwana al Mahdi, ambaye anaongoza chama cha Umma, alilalamika juu ya sera za serikali kuhusu Darfur na alishutumu wanajeshi wa serikali kuwa wanakiuka haki za kibinaadamu, pamoja na ubakaji.
Waziri wa Habari wa Sudan, Yasser Youssef, alisema Sadiq al-Mahdi aliachiliwa huru kufuatana na sheria za nchi, lakini hakueleza zaidi.

RAIS ROUHANI AONANA NA MASHABANE MJINI TEHRAN

Rais Hasan Rouhani amesema kuwa, vikwazo vya kidhulma dhidi ya Iran havikubaliki na ndio maana mashirika ya Magharibi hivi sasa yanafanya mazungumzo na kuweka mikataba ya ushirikiano na Jamhuri ya Kiislamu ya Iran.
Rais Rouhani amesema hayo jana mjini Tehran wakati alipoonana na Waziri wa Mashauriano ya Kigeni na Uhusiano wa Kimataifa wa Afrika Kusini, Bi Maite Nkoana-Mashabane.
Rais wa Jamhuri ya Kiislamu ya Iran pia ameipongeza Afrika Kusini kwa msimamo wake kuhusiana na miradi ya amani ya nyuklia ya Iran na kusisitiza kuwa, taasisi ya vikwazo viovu na vya kidhulma vilivyowekwa na nchi za Magharibi dhidi ya Iran inaandamwa na matatizo mengi sana.
Aidha amesema, Jamhuri ya Kiislamu ya Iran iko tayari wakati wote kwa ajili ya makubaliano ya mwisho ya mazungumzo ya nyuklia baina yake na kundi la 5+1 kwa mujibu wa sheria za kimataifa.
Vile vile ameipongeza Afrika Kusini kwa mnasaba wa maadhimisho ya mwaka wa 20 wa ukombozi wa taifa hilo kutoka katika makucha ya makaburu baada ya wanamapambano wa nchi hiyo wakiongozwa na kiongozi shujaa hayati Nelson Mandela kuushinda utawala wa kibagu nchini humo. Ameongeza kuwa, mapambano ya wananchi wa Afrika Kusini yameandaa uwanja mzuri wa kiroho, kisaikilojia na kiutamaduni wa kuweza kudumisha ushirikiano baina yake na taifa la Iran.

SHAMBULIO LA KUVIZIA LAUWA WATU 7 NCHINI YEMEN

Wahudumu wa tiba saba wameuawa na wengine kadhaa kujeruhiwa katika shambulio la kuvizia katika basi lao huko kaskazini mwa Yemen. Watu saba hao walipoteza maisha baada ya basi walilokuwa wamepanda kushambuliwa ghafla kaskazini mwa Aden wakati walipokuwa wanaelekea katika hospitali moja ya jeshi.
Basi hilo lilikuwa limewapakia madaktari na wauguzi wanaofanya kazi kwenye hospitali moja ya jeshi huko Aden. Mwanamke mmoja ni miongoni mwa wahudumu hao saba wa tiba waliouawa leo katika shambulizi la kuvizia kaskazini mwa Aden huko Yemen.
Watu 11 wengine wamejeruhiwa kwenye shambulio hilo. Maafisa wa Yemen wanaamini kuwa, wapiganaji wa mtandao wa al Qaida wamehusika na shambulio hilo. Itakumbukwa kuwa Waziri wa Ulinzi wa Yemen tarehe 5 mwezi uliopita wa Mei alinusurika kuuliwa katika shambulizi la kuvizia dhidi ya msafara wake. Yemen ambayo inapakana na Saudi Arabia ni ngome ya mtandao wa al Qaida katika rasi ya Bara Arabu.